HIV/AIDS dona kawnga thawhho dan tur sawiho

Nimin khan Health Minister Dr. R. Lalthangliana hovin Delhi-a Mizoram House Conference Hall-ah Zoram Medical College leh AIDS Healthcare Foundation (AHF), Los Angeles, USA te’n kumin September ni 27-a thawhhona thuthlung an ziah bawhzuiin thutkhawm an nei.

He thutkhawmna-ah hian Mizoram-ah HIV/AIDS a darh zau tawh zia leh mipui vantlangah a darh nasat tawh zia te sawilan a ni a. HIV/AIDS do zel dan tur leh mipui vantlangah tam zawka endik hna kalpui theih dan turte sawiho a ni a, tlawmngai pawl hrang hrang leh School leh College te nena thawhho theih dan tur te sawi a ni bawk. Heng bakah hian raipuar HIV hri kaite enkawl dan tur chungchangah AHF te nena thawhho theih dan te sawiho a ni a, thawhho theih ngei pawh an inbeisei thu an sawi a. AIDS Healthcare Foundation te’n Girls Act lama an hmalak dan chanchinte ngaihthlak a ni bawk a, hmeichhe naupangte HIV laka an him dan tur leh hriselna leh zirna lama an changkan zel theih na’na hmalak dan tur te pawh sawiho a ni bawk. Kum 2005 atanga kumin March thla thleng khan Mizoram-ah HIV hrik pai mi 25,982 hmuhchhuah tawh an ni a, an zinga mi 3,506 chu AIDS avangin an thi tawh a ni.