MTET-a dilna hnawl tam lutuk MZP in an thlen

Mizo Zirlai Pawl (MZP) chuan Mizoram Teacher Eligibility Test (MTET) buatsaih turah Application hnawl tam lutuk chu ennawn turin Mizoram Board of School Education (MBSE) an ngen.
MBSE hian thla thar August ni 7 khian MTET Exam buatsaih a tum a, Form fill-up mi 5000 chuang zinga Application 884 chu hnawl (reject) an ni a, hemi chungchang ah hian MZP General Hqrs. hruaitute chuan nimin khan MBSE Chairman JH. Zoremthanga chu hmuin, MBSE hotute chuan MTET Exam turah hian kum dang zawng aia applicants an tam thu an sawi a, reject tam takte chu form an fill-up laia document thehluh kim loh avangte, BA Certificate/Marksheet turah HSSLC Certificate/Marksheet an thil tel avang leh HSSLC-a zaa 45 hmuh ngai zat hmu pha lo tam takin form an fillup thu MZP hruaitute an lo hrilh a ni.

MZP hruaitute chuan, MSBE in kum khat chhunga MTET Exam vawikhat chiah a buatsaih thin avangin reject list tarchhuah hnuah pawh siamthat lehna hun siam dan tur ngaihtuah sak turin MBSE Chairman chu an ngen a, hei bakah hian kum khat chhunga exam vawi hnih tal buatsaih thin turin an ngen bawk a. MBSE Online Portal pawh tih changtlun a nih theihna turin rawtna hrang hrang an thlen bawk a ni.