Health Sunday & Hospital Sunday hman a ni

Nimin July thlaa Pathianni hmasa ber kha Mizoram Presbyterian Kohhran ni pawimawh 'Damdawi In Pathianni' (Health Sunday & Hospital Sunday) niin Tualchhung Kohhran hrang hrangah he ni pual hian hun hman a ni a. He ni pual hian Chawhnu Inkhawm-ah 'Health Sunday' puala hun hman niin 'TB Natna' tih thupui chu zirho a ni a, Zan Inkhawm ah 'Hospital Sunday' puala hun hmang lehin 'Hliam tuarte tana Samari mi tha nih' tih chu ngaihthlak leh a ni bawk.

Mizoram Presbyterian Kohhran chuan Hospital Sunday hi kum 1928 atangin a hmang tan a, kum 1981 atangin July thla Pathianni hmasa ber hi Hospital Sunday atan hman niin kum 1985 Synod Inkhawmpui thu angin kum 1988 atang khan January Pathianni hnuhnung ber chu Phâr Pathianni (Leprosy Sunday) atan hman thin a ni bawk a. Kum 2004 Synod chuan Phâr pual chauh ni lovin natna dangte pawh huamin 'Health Sunday' tiin a thlâk ta a. Kum 2008 Synod-in “Health Sunday leh Hospital Sunday hi Pathianni vawi khatah a ruala hman ni se” tia a rel angin kum 2010 atangin July Pathianni hmasa berah hman a ni ta a, chawhnu inkhawm chu Health Sunday puala hmangin Zan inkhawm chu Hospital Sunday pual atan hman a ni a. Hospital Sunday pualin Hospital Charity Fund lakkhawm a ni bawk.