Health Minister in mipuite tangkaipui MUHCS-a inziaklut vek turin mipuite a chah

Health Minister Lalrinpuii chuan Mizoram Universal Healthcare Scheme (MUHCS) chu mipui tan a duan a nih angin leh mi zawng zawng huapzo leh chhungkaw harsa tak takte pawhin an tangkaipui em avangin in register an tam chho zel tih sawiin, mipuite chu inziaklut vek turin a chah.

Health Minister Lalrinpuii hian nimin khan Bukpui Primary Health Center leh Serkhan, Lungmuat, Nisapui leh North Chaltlang Health and Wellness Centre-te tlawhin heng hmun a tlawhna ah hian MUHCS chu mipui tan a duan a nih angin leh mi zawng zawng huapzo leh chhungkaw harsa tak takte pawhin an tangkaipui em avangin in register an tam chho zel tih a sawi a, Hospital tam tak, a tira join lo te nen pawh inbiakna an nei chho zel thu leh a then chuan rawn zawm tharin tun dinhmunah inbiakna an neih pui mek te pawh an awm thu a sawi a. Heng MUHCS a in register te zingah hian mi harsa zualte leh pensioners te, Golden Card a chuanglo leh sawrkar hnathawk nilo ten an tangkaipui zual bik takzet thu sawiin, mitinin he Health Care Scheme tangkai tak hi an zawm ngei chu a duhthusam a nih thu a sawi a. Department-a thawktute pawh damlo lokal te an in register tawh em tih zawh theihnghilh lo tur leh khawtlang hruaitute pawh an khawtlang a la in register lo te hrilhhriatna kawnga tan la thar tura ngenin, mi harsa zual, MUHCS-a in register na neilo te pawh an awm theih avangin an harsatnate an bialtu MLA te hnenah emaw thlen hreh lo turin khawtlang hruaitute chu a chah a ni.

Health Minister chuan heng hmun hrang hrang leh tunhnaia District dang a tlawh chhan chu Damdawi In te tan enge an tih ngai tihte leh enge an tlakchham tihte hrechianga, damlo te tan hmun hla tak tak pan ngai lova Doctor leh thawktute leh Damdawi In te mamawh a hmun ngei a en a, thuam thar leh a ni tih a sawi bawk.

Nimin-a Minister in a tlawh Bukpui PHC hi kum 1993-ah PHC-a hlankai niin kum 2023 leh 2024 khan damdawi In fai thlanna, Kayakalp a lawmman pakhatna dawngtu an ni a. Serkhan, North Chaltlang, Nisapui leh Lungmuat Health and Welness Centre a tlawhna ah te hian Minister hnenah hian an mamawh hrang hrang an lo thlen a, Minister hian a theih anga hmalakpui a tum thu a hrilh bawk a ni.