Latest News

Vaccine la tam lamah Mizoram 7-na ni mek

India ram UT leh State hrang hrang Covid vaccine la zat tam lamah tun dinhmunah Mizoram chu pasarihna a ni mek a. Tun thla tir thleng khan hri danna dawng tawh mi 8,28,867 an awm a ni.

Nimin a SAD Conference Hall-a thu thar thehdarhtute nena inkhawmnaah National Health Mission Director, Dr. Eric Zomawia sawi danin, kum 2020 Electoral Roll atanga chhutin August 1, 2021 thleng khan Mizoram pumah kum 18 chunglam Covid-19 vaccine la thei zat chu 7,75,106 awmin, vaccine pek tawh zat hi 8,28,867 a ni a. He'ng zingah dose khatna la tawh mi 6,30,599 niin, dose khatna la tawh atanga chhutin second dose la tawh hi zaa 31.4 niin, mi 1,98,268 an ni.

Mizoram-a vaccine la thei zawng zawng atanga chhutin zaa 81.4% pek an ni tawh a. District hrang hranga vaccine pek chhuah tawh dan chu Aizawl West District-ah 103% a ni a. Hemi chungchang hi sawifiahin National Health Mission Director, Dr. Eric Zomawia chuan, “Sikul naupang, District hrang atanga rawn awm te, ram pawn lam mi hnathawka awm te, voter ID pawh nei lem lo hri danna pek theih dan awm si te leh mi dang dang an tam avangin, pek zat hi a sang a ni,” a ti.

Aizawl East-ah zaa 98, Serchhip District-ah zaa 84, Lunglei District (Hnahthial huamin)-ah zaa 80, Siaha District-ah zaa 78, Champhai District (Khawzawl huamin) zaa 76, Kolasib District zaa 73, Mamit District zaa 61 leh Lawngtlai Distict-ah zaa 44 an awm thung a. Lawngtlai District-a Vaccine la an tlem chhan hi hri kai an tam bakah Containment Zone puan a nih avanga tlawhpawh theihloh an awm tam vang a ni bawk. Hei bakah hian July 30, 2021 thleng khan nu naupai zingah vaccine la 3,013 an awm tawh bawk a ni.

Comments

Popular News (Last 30 Days)