Latest News

Chanchin thar thenkhat :

 Head of Office te kokhawm

Agriculture Minister leh Lunglei West bialtu MLA ni bawk, C. Lalrinsanga chuan nimin khan Lunglei-a Convention Centre-ah Lunglei District-a Department tin Head of Office-te kokhawmin Interactive Meeting a neihpui a. He hunah hian Minister chuan Department hrang hrang ten thawh-hona tha tak nen hma an la tlang thin chu lawmawm a tih thu sawiin, Department zawng zawng huap Interactive Meeting chu Department hmalakna te leh harsatna neihte langtlang taka an inhriattawn sak theihna tur leh Department-ten thawhhona leh tanrualna tha zawk an neih theihna tura koh anih thu a sawi bawk. Nimin a he hun hman hi Lunglei DC, V. Lalsangliana chuan kaihruaiin Lung-lei HPC Vice Chairman, Lawmawma Tochhawng leh Lunglei South bialtu MLA, Dr. K. Pachhunga te pawhin an hmanpui bawk a ni.


RD Deptt. inhlantharna nei

Rural Development Minister, Lalruatkima chuan lockdown hunlai atanga Vawiin thlenga Mizoram-ah chhuanchham an awm loh na chhan pawimawh tak pakhat chu RD hmalakna a ni, a ti. Rural Development Department in nimin-a an Department Conference Hall, Aizawl-a inhlan-tharna hun an hmanna a hmanpuina ah he thu hi sawiin RD Minister, Lalruatkima chuan hripui leng in harsatna tam tak thlen mahse Mizoram mipui te zingah zonunmawi parchhuakin, thenawm te leh veng te inlainattawnna nen, khawtlang-ah chhuanchham awm hlauvin induhsakna an lantir a; VLTF leh LLTF ten mahni khawtualah hma an la a; sawrkar, Kohhran leh tlawmngai pawl hrang hrang te thawhhona leh mipui te thuawihna avangin India ram State te zingah COVID-19 vei (active case) nei tlem ber te zing ami kan nih thu a sawi bawk.


Lehkhabu thar tlangzarh

Health Minister, Dr. R. Lalthangliana chuan nimin khan a Pisa-ah Lungleng Lal Khamliana Sailo chanchin, Lalzidinga Sailo (Dingtea) ziak chu a tlangzarh.


PC Party Office hawnna nei

Peoples' Conference (PC) Party chuan Ai-zawl-a an Office chu nimin khan kumin atana hawnna hun an hmang a, he hunah hian an party Sr. Vice President, Vanlalruata chuan thu sawiin Mizoram-a party hrang hrang vote neih dan dinhmun  a tarlang a, PC chuan vote 60,000 vel a nei mek nia sawiin, Party miten tan an lak tlan chuan hei hi awlsam taka tihpun theih a nih thu leh, MLA inthlan lo awm leh huna PC Party a sawrkar theih thu a sawi bawk. He hunah hian an Party President, Lalhmangaiha Sailo leh Vice President, Lalrinzuala Chawngthu te pawhin thu an sawi bawk.


ZIDCO inhlantharna nei

Zoram Infrastructure & Industrial Development Corporation Ltd (ZIDCO) chuan nimin khan Aizawl-a an Office-ah kumin atana inhlantharna hun an hmang a, he hunah hian  ZIDCO Chairman, Lalthlengliana chuan Sawrkar laipui in Department pakhatah chauh hnathawh tur lian  (project) pek thin chu an sim deuh tan nia sawiin, Public Sector Undertaking (PSU) lam an hawi thu a sawi a. Tunah hian ZIDCO chuan Brick Industry siamna tur sum NEC kaltlangin an hmu dawn tih a sawi a, thawktute chu theihtawp chhuah turin a sawm bawk.


Pawndum nen CM lo hmuak

Nimin-a Khawzawl-a zinchhuak Chief Minister, Zoramthanga chu Kawlkulh khaw mi ten Pawndum nen an lo hmuak a, Seling leh Cham-phai inkar, NH. 6 laihzauh hna thawh turin Kawlkulh khuaa kawng ruh awmsa hel lova an khua a paltlang ngei theihna turin Kawlkulh hian hma an lo la tawh thin a, he an hmalakna a hlawhtlin theih nan Chief Minister hi an khaw dai-ah hian lo hmuakin NGO Coordination hruaitute chuan Chief Minister hi hemi chungchang hi an sawipui nghal a, Chief Minister chuan kawngpui in an khua a hel dawnlo tih a hrilh nia thudawn a ni.

Comments

Chhiar Hlawhte