Latest News

A Gujarat kal loh thlak e mai!

A Gujarat kal loh thlak e mai!

- C. Lalhminghlua

November ni 22-27 chhung khan Mizoram sorkar Information Department te ruahman angin NEDP sum-a Gujarat tlawhtu mi 12 zingah ka tel ve hlauh mai a, vannei ka inti hle. Anni chu state hlun tawh an nih avang leh an ram leilungin a zir avangin kan ram chu tehkhin tham a ni meuh lova, kan ram tana hlawk tur zawnga ngaihtuahna han pek dawnin a khirh ru riau a, kan entawn atana \ha leh kan hriat awm chi deuh vantlang nun lam ka han thur ve ang e.
Kan hriat angin Hindu kulmuk State a ni a, amah Pu Zonunsanga Khiangte, MJA Vice President sawi dan takah thim deuh khup leh muk uk khuk tura ngai kan ni a, a hmun kan han thlen chuan chutiang a lo ni hauh lo. An Hindu-na chuan an nun belhchian dawlah a siam em ni ka ti a, leh... kan zu belh ho kha mipui chung lam an nih vang pawh a ni mahna. Tin, an sakhaw inzirtirna in nungcha hmangaihna ah rah a chhuah tih hriat takin, an khawpui chhung thing tin maiah chuan zing chauh pawh ni lo, chhun lawnah pawh nungcha hmuh tur a awm reng a. A bikin Hleimualrang nupa phei chu englai pawhin hmuh tur a awm a, kan thlenna State Guest House tual phulah neitu bik pawh awm lo Ar-awn hmuh tur a awm deuh reng. Hemi mai bakah hian Parva an tam namen lo bawk a, Khaw chhungah sava mak leh mawi tak tak inlar hmuh tur awm reng khu Sava awm na bik nia sawi, tui Sava awmna ‘Birds Sunctuary’ Tuipui a hranpaa kan tlawh ai mahin hmuhnawm kan ti zawk.
Amedabad-a innghat chungin, District hrang hrang te pawh kan tlawh a. An kalkawng chu phaizawl a nih avangin thlur khata motor pali leh a aia tam pawh tlan theihna a ni a. An Highway kawng leh kawng inkarah pangpar an ching a, a vaiin a ni em ka hre lova, pangpar chawmtu tur tui pipe te dum chi hi pangpar bulah chuan a awm hlawm bawk a, tui an pek duh hunah a herhna an herh hunah tui an pe mai \hin dawn a ni. 
Lei dawh a tamin chhiar sen chi pawh a ni lo, an Lei te chu a lian em em a, Mizoram-a kan Lei neih \ha ber ber te hi chuan a \hat lamah a laihawl a thleng pha lo. An hnathawh dan an sawi a\anga thil lang chiang tak chu a thawktute an thawhah an chiang a, an chunga mite an zah thiam a‘ka hlawh a kiam chuang lo’ ti ni awm taka run dala thawk mai mai an ang lo. Tin, an Two Wheeler leh motor dang pawh man to pui pui a tam lova, Two Wheeler ho pawh 125cc vel te te an ni ber a, Two Wheeler-ah Helmet an strict ve lo tlat khu a mak a, an motor speed tlangpui keini ah 40 vel a nih laiin an ni ah chuan 80-100 a ni ber. Mahse kawngpui a zauin a mam bawk a, chuan a hrehawm phah chuang lo. 
Mihring tam lamah kan inthlau hle a, mihring 10,97,206-ah MLA 40 kan neih laiin an ni chuan mi maktaduaih 62.7 niin MLA 182 ngawt mai an nei phak a nia, inthlau lo zia kan ni lo. Mikhual tlawh tur mi hip chi an nei tam lova, an neih ho te pawh sum leh pai an ngah avanga siam chawp leh tihhlut chawp, Gandhi Mandir tih ang te khu a lian deuh chu an ni. Zu khuahkhirhna hmun a nih angin ni nga kan cham chhung khan zurui pakhat mah ka hmu lova, zu lei ruk tur pawh hmuh tur a vang an ti a, keini khap lai ai kha chuan mipuiin an zawm \ha hmel. Engti takin nge Vaihlo dova hma an lak kan hre chiah lo na a. Mei zial zu put put ka hmu lova, Kuhva pawh lei mai tur a awm hek lo. Jarda erawh chu an ei nasa ve tho mai. 
State leh ram hmasawn sawi nan Gujarat khu kan hmang zel ang a, hmasawnna man pha lo deuh chu ‘A Gujarat kal loh thlak e mai!’ kan la inti hial ta ve ang. Amaherawh chu, an hmasawnna hmuh a nuamin a ropui hle chungin, Kutdawh leh kawngpui kama riak mai mai tam tak an la awm tlat si khu hmasawnna a kai rual lo nge ni? thil mak chu a ni ve thung. Concrete Building chhawng sang pui pui bul vel leh khawpui chhung lun laia mirethei In, heng laia kan Ar In ang vel lek ni awm tak awm \euh mai leh, zan thimhlima kut dawh naupang rawn inlar, motor kawngkhar inkharkhip chung pawha an rawn kik kauh kauh reng mai te leh kawngsir kea kalnaa riak mai mai te, khaw laia Uicho hrisel lo tih hriat reng nen lama an zuah leh an ran serh, Bawng khu chu an hnawk ve ngiang mai. 
In chhawng sang pui pui, a chung ber hmu tur chuan lukhum tla tap tap tham tam tak khir uaih leh lirthei tlanna motor Lei sei leh lian pui pui kara mirethei ho inzep ve tlat khu, CM \ha ber pawla sawi leh PM hial ni ta, Pu Modi-a meuh pawh hian tihngaihna a hre biklo chu a ni phawt mai ah. Mirethei hmangaih lovah sorkar puh a, ‘mirethei, tukkhat tla pawh nei lova mei alh en te hlam chhiah’ tia puh te a hlawh ve bawk lo’m ni te ka tia. Mizote hi kut dawh hnama insawi ve \hin ni mah ila Mizo dik tak chu kan awm meuh lova, kan rilru pachhe lutuk sawina a ni rih mai a. Anni chu a tak taka kut dawh awm reng khuan an khawpui ropui leh hmuhnawm tak khu a ti bal ve chiang. Mizo hi hnam hmelchhe tak emaw kan nih kan intih laiin anni ho khu a nih khu lo hmel chhia, chuti lamah chuan an pachhe khawp mai. Faina-ah nise an khawpui lun lai a fai em em rualin a kilkhawr deuh chu hnawk ve tak a ni tho. Kan tluk lo han han hlea a lan laiin a vai vai chuan an lakah kan tlawm vek bik lo ka ti ve a ni.  
Hengte hi Gujarat kan tlawh lai leh tunhnu pawha ka rilrua riak zui reng te an ni a. A hmuna sorkar motor var 3 a hruai, Police 2 ven leh min hruaitu pilot motor leh Officer( Guide) 2 hruaia kan awm theihna Pu C.Lalnunmawi @ L.Chuaungo, IAS GAD Secretary (Serchhip makpa, AOC Veng-a Pi Saichami Sailo fanu, Mahruaii pasal), vang liau liau in khu laiah chuan VIP taka zu chetla vel kha kan ni a, kan phu hlawl lo, a chungah kan lawm hle. Ani bakah hian hun engemaw chen Press Tour Programme mumal tak awm mang tawh loh laia zin theih tura hmalatu Mizoram sorkar hotute leh I&PR Director Pi Lalnithangi leh a thawhpui te an fakawm.
Hetiang zinchhuah programme hi a hlawkin chhunzawm zel theih nise. Kan state tana chhenfakawm turin mithiam zawk te pawh inzep ve se, a puangzar turin media te awm tho bawk se kan va hlawkpui lehzual dawn em!

Comments

Popular News (Last 30 Days)