Mizotaxi app sawiho niin Taxi inziaklut 1570 an awm tawh

Coordination Committee on Traffic Management chu nimin khan Chief Secretary’s Conference Hall-ah thukhawmin Mizotaxi app chungchang an sawiho.

Chief Secretary Khilli Ram Meena hova thutkhawm ah hian nimin, September ni 11 thleng khan Mizotaxi App-a inziaklut lirthei 1570 an awm thu leh heng zinga 397 chu Four Wheeler Taxi niin 1149 chu Two Wheeler Taxi leh Auto Rickshaw 24 an nih thu tarlan a ni a. Mizotaxi App kaltlanga Taxi hman tum chhinchhiah zat chu 28,553 niin nimin khan Taxi Driver online 279 an awm tih tarlan a ni.

He thutkhawmah hian Mizotaxi app chu State Transport Authority-in Taxi rate a bithliah dik tak hman a nih theih nan te, Taxi hmangtu passenger-te him zawk nana hmanraw tangkai a nih theih thute leh Aizawl khawpui chhunga Taxi Parking Area tawt lutuk tih ziaawm nana hmanrua a nih theih dante sawilan a ni a. Inziahluh hun pawhseina hmasa chhung khan Taxi inziaklut an thathnem thu leh mipui pawhin Apps hi an hmelhriat tanin an hmang thiam chho tan mek tih tarlan a ni a, Apps-a inziahluh hun hi thla thum (3) dang hawn belh leh rawt a ni bawk.