MNF party in Inthlanpui thlirletna hun an hmang

Serchhip-a MNF Party chuan Inrinni khan Serchhip-a Mizo Hnam Run-ah inthlan thlirletna leh lawmthu sawina inkhawm an nei.
MNF Serchhip East Block President H. Lalthianghlima kaihhruai he hunah hian Serchhip Bial-a MNF Candidate J. Malsawmzuala Vanchhawng chuan inthlanna zawhfel takah MNF party tana vote petu zawng zawngte chungah thinlung takin an lawm tih sawiin, Pathian leh mipuite zarah Serchhip bial mipuite tana rawngbawl theihna hun siamsak an nih ngei a beisei tih a sawi a. Party mipuite chu hnehna an chang emaw, chang lo emaw, tun atangin campaign tan leh nghal anga inngai turin a chah bawk. J. Malsawmzuala Vanchhawng chuan Politics ah phuba lak a rem lo tih sawiin, mipuiten duhthlanna thiang tak an lantir atanga inthlan result lo chhuak tur chu pawm thiam turin an party mipuite chu a chah a, hnehna an chang a nih pawhin mipuite duhsakna vang a ni tih hriaa inngaitlawm taka lawmthu sawi nachang hre tur leh hnehna an chang lo anih pawhin Pathian hun ruat a la ni rih lo a ni tih pawm thiam turin a chah bawk.

Inthlanna zawhfel takah Serchhip bial MNF party mipuite chu party dangte nena khaikhinin a thawkrim ber leh lungrual ber an ni tih pawh an Candidate chuan sawiin, Campaign beihpui an thlak chhungin Pathian duh zawng thlir chungin fimkhur takin hma an la a, dai pelh leh tih sual lian lutuk an nei lo nia a hriat thu a sawi a, mi rilru tihnat an neih a awm chuan Pathian hmingin ngaihdam an dil tih a sawi bawk.