Assembly Inthlanpui-ah Serchhip District-ah leh Thorang Bial-ah Vote a tla tha ber

Mizoram Assembly Inthlanpui 2023-ah Serchhip District chu vote tlak thatna ber District niin, Assembly Constituency zingah Thorang bial-ah vote a tla tha ber bawk.
Kumin inthlanpui ah hian Mizoram District 11 zingah Serchhip District chu vote tlak thatna ber niin, vote nei zawng zawng zinga zaa 84.78 in vote an thlak a, Mamit District chuan dawtin vote zaa 84.65 a tla a, Hnahthial District chu pathumna niin vote zaa 84.19 a tla bawk a ni. Hetihlai hian vote zaa 80 tlak tlin lohna District pathum awmin, Siaha District-ah zaa 77.03, Aizawl District-ah zaa 77.83 leh Champhai District-ah 79.92 te a tla a, District dang zawngah vote zaa 80 chunglam a tla vek thung a ni. 


Assembly Constituency 40 awm zingah Lunglei District-a Thorang Assembly Constituency-ah vote tla tha berin Voter zaa 88.19-in vote an thlak a, vote tlak tlemna ber, Saiha Assembly Constituency-ah vote zaa 75.32% a tla thung a, Polling Station 1,276 awm zingah South Tuipui Constituency chhunga awm Aithur Polling Station leh Lungpuitlang Polling Station-ah voter awm zawng zawng, zaa za ten vote an thlak vek bawk a ni.

Tun tum inthlanpui-ah hian mipa aiin hmeichhe vote thlak an tam zawk a, Mizoram pumah hmeichhia 3,56,707-in vote thlakin hei hi Mizorama hmeichhe vote nei zawng zawng atanga zaa 81.25 an ni a, mipa 3,30,627-in vote thlakin hei hi mipa vote nei atanga zaa 80.04 a ni thung.


Tun tum inthlanah hian Vohbik kan tih, PwD zingah vote nei 3,381 an awm a, kum 80 chunglam mi 7,908 bakah kum za chuanga upa 578 an awm bawk. Kum naupang, vawi khat vote thlakna kum 18 leh 19 pawh mi 50,751 an awm a, kum 20 leh 29 inkar vote nei 2,54,677 awmin kum 30 leh 40 inkar mi 2,39,467 an awm bawk a. Kum 41 leh 60 inkar mi 2,26,071 awmin kum 61 chunglam mi 81,122 an awm bawk a ni.

Nov. 7-a Vote thlak ah khan Lawngtlai East bial-a Pangkhua-ah kum 115 ni a sawi Famiangi chuan Polling Booth-a kalin vote a thlak a, a vote thlak zinga upa ber ni a hriat a ni. Famiangi hi a EPIC-ah chuan kum 1920 a piang anga ziahluh nimahse, EPIC siamlai vel hian a pian kum dik tak hriat a ni lova, rinthuin a pian kum hi dah a nih thu an sawi a, Pangkhua khawtlangin Famiangi kum hi an theih ang anga kum upa lam te leh a fate bia a an chhutdanin kum 1910 hnulama piang chu ni theia an ngaihloh thu an sawi a ni.

Comments

Popular News (Last 30 Days)

LPG man bithliah thar