Sa, Artui leh Bawnghnute-a intodelh tura hmalakna sawi

AH&Vety Minister C. Lalsawivunga chuan Mizoram chu Sa, Artui leh Bawnghnute-a intodelh turin hma an la mek tih a sawi.

Nimin-a ZPM Chhung Inkhawm neih ah AH&Vety Minister C. Lalsawivunga chuan Mizoram chu Sa leh Artui-ah kan la intodelh loh avangin hma an la mawlh mawlh tih sawiin, “Artui-a kan intodelh ve theih nan Mega Egg Production Firm, Arpui 1,00,000 vulh theihna turin Thenzawl-a AH & Vety Complex-ah din turin chak taka hmalak mek a ni a, he project atang hian nitin Artui tharlam 70,000 atanga 75,000 tharchhuah theih beisei a ni a, cheng vbc. 20.63 senna tur project a ni,” a ti a. ASF avanga harsatna nasa tak kan tawh sutkianna turin Animal Insurance/Livestock Insurance tha tak Chief Minister hmalakna in kan nei tawh tih pawh sawiin, “Hei hi State history-a la thleng ngai lo a ni. Kumin February atang khan Animal Insurance hi hman tan a ni a, August 11,2026 thlenga Vawk, Bawng leh Kel Insurance tih zat chu 4,724 a ni a, dilna lut pek tawh 219 awmin heta tanga sum pekchhuah tawh zat chu cheng nuai 41.10 a ni,” a ti bawk.

Ranchaw siamna tur atan Hand Holding hnuaiah Pilot Project kalpui mek a ni tih pawh AH&Vety Minister chuan sawiin, “Vaimim leh Bekang chin pawlh (contract farming) kalpui niin Champhai leh Khawzawl District-a khaw 11-ah hmalak mek a ni. Hei pawh hi Mizoram-a a vawi khatna a ni a, he Project-ah hian farmers 529-ten Vaimim leh Bekang an ching a, Vaimin chi kg. 4428 leh Bekang chi kg. 2184 semchhuah tawh a ni bawk. Bawnghnute, Artui leh Sa ah kan intodelhna turin ranchaw siamchhuah tam a ngai a, hmalak chhoh mek niin Thenzawl-a Vety Farm-ah cheng nuai 211 sengin hmalak chhoh mek a, Hnahlan-ah cheng nuai 62 sengin hmalak tura ruahman peih a ni tawh bawk. Hortoki-ah ranchaw chinna hmunpui tur ruahmanna kalpui mek a ni,” a ti bawk.