Lunglei Park cheithat hna thawh tur lungphum phum

Urban Infrastructure Development Fund (UIDF) sum cheng nuai 200 senga Lunglei Park (Chanmari, Lunglei) chei that hna thawh tur lungphum chu nimin khan Health & Family Welfare Minister Lalrinpuii chuan a phum.

Lunglei Park Renovation lungphum phum puala UD&PA Office-a inkhawm tawi buatsaihah Health Minister Lalrinpuii chuan Lunglei cheithat leh cheimawi chu a tir atanga a rilru-a lian leh a vei a nih thu sawiin, ‘Unique Lunglei’ tih hming chawiin mawi danglam bik taka Lunglei chei turin Lunglei Beautification Committee an din thu te, Lunglei-a MLA-te leh Lunglei Municipal Council (LMC) Councillor-te'n Lunglei cheina tur sum thawhkhawma ruahmanna siam a nih thu leh hma lak chhoh zel a nih tur thu te a sawi a. Lunglei khawpui laili taka awm Lunglei Park chu Lunglei cheimawitu atan leh vantlang len khawthawnna hmun nuam taka siam turin LMC leh UD&PA Department te nen chei that dan tur kawng dap a nih thu te a sawi a ni.

Minister Lalrinpuii chuan Lunglei khawpui hmun hlui pawimawh, Tarmita Khawthlir-ah ‘Skywalk’ siam tum a nih thu sawiin, Ministry of Tourism hnuaia PRASHAD (Pilgrimage Rejuvenation and Spiritual Heritage Augmentation Drive) Scheme atangin cheng vbc. 3 chuang project buaipui mek a nih thu leh hlawhtling ngei tura beisei a nih thu a sawi a. Lunglei mawi taka siam turin LMC lam thawhpuina leh enkawlna hnuaiah hmalakna hrang hrang kalpui chhoh tum a nih thu te, sum leh pai leh ruahmanna chungchangah UD&PA lam nen inrawn tlanga hmalak a nih thu te sawiin, UIDF hnuaiah pawh hmalakna dang tam tak a la awm thu a sawi a. UIDF hnuaia hnathawh chu a enkawlna tur mahni inchawm thei (sustainable) a nih a tul thu te a sawi bawk.

He hunah hian LMC Chairman Lalzuithanga chuan sawrkarin LMC kuta Lunglei Park enkawl mawhphurhna a hlan atangin theihtawp chhuahin chei that dan tur ruahman a nih thu sawiin, Lunglei Park hmunhma tunhma atanga Padma Shri J. Buana'n vantlang tana a lo humhalh tlat chu lawmawm a tih thu a sawi bawk.

Nimin-a he hun hman hi LMC Vice Chairman K. Lalrinawma'n kaihruaiin, Lunglei District Urban Development Officer Lalhruaitluangi'n report pe a. Lunglei Park chei that hnaah hian 57ft x 13ft-a zau In chhawng hnih sakna tur te, thil phochhuahna leh vantlang thil huaihawtna tur hmun awl, naupang infiamna tur leh thut chawlhna siamna tur te, tuallai khawnvar dahna tur te, lungrem leh lemker chi hrang hrang siamna tur te, a chhuat zawl siam thatna leh a hungna siamna tur te a tel tih a sawi a. He hna thawk tur hian A3 Design Build, Zonuam, Aizawl te thlan niin an hna hi July ni 30, 2026 khan tanin, thla 18 chhunga zawh tur a ni ang.