Ruahsur avangin chhiatna tenau thleng a awm

Tunhnaia ruahsur nasa avangin Serchhip District-ah chhiatna lian lutuk thleng a awm hriat ala ni lo a, Serchhip Mat Phai-a buh leh thlai hmun zau tak erawh tuilian in a chim tawh.
Mizoram in Fur ruahtui a dawng leh tan mek a, tunkar tir lam atangin ruahtui tla hi tam tanin hmun hrang hrangah leimin leh chhiatna thleng riat tur awm chho leh tawhin Serchhip District-ah chuan ruahsur leh a kaihhnawih avanga chhiatna liantham thleng ala awm lo niin a lang a, Chhingchhip Mualpui-a St. Peters HSS Retaining Wall chu chimin hei hian a thlang-a kawng hnawhin In erawh a chhe phak lo deuh a, Serchhip Dinthar Veng-ah nizan hmasa khan leimin in 207 Truck pakhat chu a hmalam delhin Motor hi a chhe nasa lutuk lo bawk.

Hetihlai hian Serchhip Mat phai erawh tuilian in a chim tan leh mek a, tunhnai ruahsur avang hian Mat lui chu nasa taka lian leh tawhin tuilian hian buh leh thlai hmun zau tak a chim leh tawh a, tuilian avang hian buh leh thlai hmun zau tak a chhiat leh rin niin tuilian a kam hnuah chhiatna a thlen dan kimchang hi hriat theih a ni dawn chauh a ni.