Insuamna thleng nia sawi ah finfiahna a la awm lo
Mizoram Police te chuan tunhnaia Lawngtlai District chhung Chamdur 'P' dai-a insuamna thleng nia sawi ah tun thlengin finfiahna ala awm lo tih an sawi.
Nimin a thuchhuah an siamah Mizoram Police te chuan July 7, 2026 khan Lalbiakzuala, Thingsai (Hnahthial District), tuna Salem Veng, Aizawl-a cheng, Chamdur-I Presbyterian Biak In chei that hna thawk mektu (SubContractor) chu Bolisora-a mamawh lam tura a kal haw lam, Chamdur 'P' daiah tu tih hriat loh ralthuam keng mi pariatin an lo suam thu Police-in an dawng tih sawiin. misual te kuttuartu Lalbiakzuala sawi danin, heng mite hi ramhnuai atanga lo chhuakin amah hi an dap a, a lo tan deuh avangin silai kawm-a chhuin rakzu fun nga leh Rs. 600 laksakin an tlanbo a. A sawisatu zinga mi pathumte chuan AK Rifle kengin midangte hian ulhbun bakah tualchher silai an keng a ni.He thil thleng hi Police te chuan ngaihven nghalin July ni 8, 2026 khan Vasei Police Station atangin Officer-in-Charge hovin Chamdur 'P'-ah hian kalin chipchiar takin thil awmdan chhui zui a ni a, YMA-te ngenna angin, a tuartu hi Primary Health Centre-ah Medical examination tih niin Health Worker te chuan a taksa ah hliam hmuh theih, duk emaw pilh emaw engmah a awm loh thu an report niin an sawi a. Thuhretu hrang hrang te thu zawhfiah niin rinhlelhawm deuh te pawh thu zawhfiah niin heng mite erawh hi chu an inhnam-hnawih lo nia hriat leh an ni bawk.
Chhui zuina atangin Lalbiakzuala hian mi dang kaltlangin Bolisora-a mi zu a lei ngei tih finfiah a ni a, Lalbiakzuala thu leh a hmuna awm thuhretute sawi dan thil inmil lo a awm nual tih hriat ni bawkin, kut tawrhna hliam hmuh tur awm lo te, thuhretute thil sawi dan nena inpersan tak tak thil a awm avang leh thil chhui tawh chin atang hian he insuamna hi tun thleng chuan finfiah loh tih Police te chuan an sawi a ni.