Govt. Mizoram Law College atanga LLB zirchhuak 853 tling tawh

Kum 1986 atanga kumin thlengin Govt. Mizoram Law College atanga Bachelor of Law (LLB) zirchhuak mi 853 an awm tawh.

Mizoram Law College thawktu ten Akashvani News Aizawl an hrilh danin, Mizoram Law College-a Bachelor of Law (LLB) zir tur hian University Grants Commisssion-in a a pawm zirna In atanga Bachelor Degree leh a tlukpui neih a ngai a, heng bakah hian Bar Council of India Rules of Legal Education-in a phut angin, General Category tan Graduate leh a tlukpui exam-ah General Category-te tan mark za zela 45, OBC te tan za zela 42 leh Scheduled Caste leh Schedule Tribe-te tan za zela 40 hmuh a ngaih bakah Entrance Test pawh Bar Council of India Legal Education Rules duhdan anga neih a nih thin thu an sawi a, LLB zir hun chhung atan hian kum 3 bituk a nih thu an sawi bawk. 

Mizoram Law College hi kum 1983 khan ‘Aizawl Law College’ ti a hming pu in, khatih hunlaia JL High School, tuna JL Higher Secondary School ni ta, Aizawl Khatla-ah bultan a ni a, kum 2004 July thla khan kum 1996-a din, Liandingpuia Law College nen chhunfin niin, kum 2004 October thla khan ‘Mizoram Law College’ tih hming a pu chho a. A hmasa berin he College hi Meghalaya khawpui Shillong-a North Eastern University (NEHU) nen in affiliate in, Kum 2001-a Mizoram University din a nih hnu atanga tun thlengin MZU nen hian an in affiliate bakah, Bar Council of India-ah affiliation tih a ni bawk.