Bawlhhlawh khawnkhawmna tur motor semchhuak

Public Health Engineering (PHE) Department-a Swachh Bharat Mission (Grameen) chuan nimin khan Aizawl atangin Bawlhhlawh khawnkhawmna tur Motor, Solid Waste Collection Vehicle chu an vailiam.
Hemi puala Project Management Unit (PMU), PHED Office tual-a hun hman ah PHE Minister Prof. Lalnilawma chuan Bawlhhlawh khawnkhawmna tur lirthei semchhuahte chu faina kawnga Mizoram hmalakna pawimawh tak a ni tih sawiin, Mizote chu faina kawngah hma sawn viau tawh mah ila, zir tur kan la ngah thu a sawi a, “Kan thawmhnawte a fai a, a langah chuan kan changkangin kan fai viau tawh a, a lang lo lamah erawh kan la fai tawk lo hle. A langa kan fai ang hian a lang lo lam, kan chhehvelte pawh fai se chuan kan lui tui nu te pawh a zia deuh anga, lui dunga Plastic Bottle leh polythene len thla tam lutuk te pawh hi a ziaawm deuh dawn a ni,” a ti a. Sawrkarin faina lam hawi Infrastructure a bun te chu mipui ta a nih angin a enkawl zui hna pawh khawtlangin an mawhphurhnaa an lak a ngai tih sawiin, hengte hi a hlawhtlin theih nan mawhphurhna tam zawk hi Village Water & Sanitation Committee (VWSC) te kutah a awm tur thu a sawi bawk.

He hunah hian PHE Minister chuan SMBM-G hnuaia bawlhhlawh sawngbawlna kalpui mek a hman tur motor pasarih (7) chu a vailiam a. Motor hi RD Block pahnih huamtu Aibawk Plastic Waste Management Unit, RD Block pathum huamtu Seling PWMU, RD Block pathum huamtu Serchhip SWMC leh RD Block pakhat huamtu Kawlkulh PWMU-te hman tura tih a ni a. Tun dinhmunah PHE Department enkawl SBM-G, Mizoram hnuaiah hian hmun panga-ah bawlhhlawh sawngbawlna hi mumal taka kalpui mek a ni a, chungte chu Aibawk PWMU, Seling PWMU, Serchhip SWMC, Kawlkulh PWMU leh Thaizawl PWMU te an ni a. Heng sawngbawlna hmun hian a vaiin khua 87 a huam mek a, khaw tam zawk huam tura hmalak mek a ni.

Heng bawlhhlawh sawngbawlna hmunte hi Private Operator-te leh Village Water & Sanitation Committee (VWSC) te enkawlna hnuaiah mipuite atanga User Fee tlingkhawm hmanga enkawl mek a ni a, mipuite lam atanga User Fee hi duh anga hmuh that a nih thin loh vangin bawlhhlawh sawngbawlna hmunte hian harsatna an tawk thin a, bawlhhlawh phur motor semchhuah a ni hian harsatna an tawh thenkhat a chhawk zangkhai ngei rin a ni.

Motor semchhuahna bakah hian heng bawlhhlawh sawngbawlna hmunin a huam khuate zinga bawlhhlawh thliarhrang tha leh User Fee pe tha thlanchhuah khua 25 a dah turin vantlang bawlhhlawh bawm 688 chu semchhuah nghal a ni bawk.