Kumin ah HIV hrik kai mi 611 hmuhchhuah a ni tawh

Kumin thla sarih chhung, January atanga July tawp thleng khan Mizoram-ah HIV hrik kai mi 611 hmuhchhuah a ni.

Integrated Counselling & Testing Centre (ICTC) report in a tarlan danin kumin January leh July thla inkar chhung khan Mizoram-ah HIV hrik kai 611 hmuhchhuah thar a awm a, hemi hun chhung vek hian HIV hrik pai mi 295 an thi bawk a ni. Kum 2020 atanga kumin July thla tawp thleng khan HIV hri kai mi 11,032 hmuhchhuah a ni a, kum 2022-2023 chhung kha HIV kai hmuhchhuah tam ber kum niin mi 2,388 zet hmuhchhuah a ni. Anti-Retroviral Therapy (ART) Centre atanga report danin hemi hun chhung vek hian HIV hri kai mi 2,996 an thi a, kum 2023 kha HIV hri kai thih tam ber kum niin hri kai mi 632 an thi a, a hma kum, kum 2022 khan mi 562 thiin nikum khan mi 561 an thi bawk a ni.

ART Centre atang veka thudawn danin tun dinhmunah Mizoram-ah hian HIV hri kai mi 19,837 an awm mek a, an zinga mi 18,694-te hian ART Centre-ah ART enkawlna an dawng mek a, enkawlna dawng lo mi 1,143 an awm mek bawk. ART enkawlna dawng lo zingah hian mahni duhthlanna ngei a la duh lo, hmundanga pem bo, an chin chhui zui theih loh, damdawi ngeih loh avanga Doctor-in enkawlna an chawlh lailawktir leh Pathian-a damna chang nia inhria a damdawi a inenkawlna duh lo te an ni hlawm.

Mizoram State AIDS Control Society (MSACS) in an tarlan danin October 1990 atang khan Mizoram-ah HIV hrik kai mi 32,544 zet an awm tawh a, an zinga mi 27,239 te chu ART ah inziaklut tawhin mi 5,632 an thi tawh thung a. Tun dinhmuna Mizoram-ah HIV hri kai mekte hi Aizawl District-ah tam berin mi 11,128 an awm a, Champhai District-ah 1,725, Kolasib District-ah 1,502 leh Lunglei District-ah 1,324 te awmin a tam zualna an ni a. Hnahthial District-ah HIV hri kai awm tlem berin mi 284 an awm a ni.