PPP Mode la kalpui thei lo

School Education Minister Dr. Vanlalthlana chuan Mizoram-a zirnain hma a sawn theih nana Public Private Partnership (PPP) Mode ruahman chu kalpui theih a la ni lo tih thuthar thehdarhtu ten an kawmna ah a sawi a. PPP Mode kalpui chu thil hmanhmawhthlak a la nih loh thu leh State dangin an kalpui dan zirchian hmasak phawt a ngai tih sawiin, Mizoram Education Reforms Committee-in an buaipui mek tih a sawi a, tun dinhmun ah chuan zirna kalpui dan thlak tumna a la awm rih lo tih a sawi bawk.

Education Minister chuan tunhnaia Zirtirtu lak chu Dan dik tak hmanga lak an ni tih pawh sawiin, Casual Teacher pangngai anga lak an nih thu leh duhsak bik nei lovin a thiam thiam lak an ni tih a sawi a. Kalphung tharah chuan Zirtirtute an awmna hmun ngaiah an awm reng thei dawn lova, khawpuia awmte pawhchhuah an ngai dawn a, Aizawl-a awm te chu District dangah pawh an awm a ngai dawn niin a sawi bawk.