Mizo zinga All India Radio Top Graded Artist awmchhun Vanhlupuii vuiliam a ni ta

Mizo zaithiam leh Mizo zinga All India Radio Top Graded Artist awmchhun Vanhlupuii chu Inrinni zing dar 2:00 vel khan kum 77 mi niin a thi a, Inrinni vek khan vuiliam nghal a ni.

Vanhlupuii hi kumin February ni 22 khan a chauh deuh thut avangin Aizawl-a Ebenezer Hospital-ah luhpui a ni a, rang taka enkawl niin Dialysis te tih a nih hnuah a harh tha viau a, a taksa peng pawimawh ho pawh an tha viau nia sawi a ni a. Amaherawh chu March ni 26 vel atang khan a chau leh thut a, CT Scan result atangin Stroke a nei tih hmuhchhuah niin March ni 29 khan ICU-ah dahluh a ni a, Thawkna khawl hmanga thawktir a nih hnuah Inrinni zing khan a boral zui ta a. Inrinni-a amah thlahna hunah hian amah uitu mi thehnam tak an tel a ni.

Vanhlupuii hi July ni 2, 1946 khan hla phuah thiam Vankhama leh Laldengi te inkarah piangin Aizawl Dawrpui-a Vankhama Building-ah an khawsa a, March 14, 1973 khan Lalthuama nen inneiin fapa pakhat leh fanu pahnih an nei a ni. Kum 1950 vel atangin a zai tan a. Zaithiam avanga ram hrang hrang a fankual tawh bakah zai intihsiakah pawh lawmman pakhatna vawi tam tak a lo la tawh a. Kum 1957 atangin Radio-ah hla a record tan a, kum 1969-ah Grade ‘A’-ah a kai chho a, Mizo zaithiam zingah All India Radio (AIR) Top Grade Artiste awmchhun a ni zui a. A khawvel zinkawng a zawh tawp thlengin Mizo zinga Top Grade Artiste awmchhun a nih bakah Northeast-a AIR Top Grade Artist pathum awm zinga mi a ni a, an zinga pakhat hi kum 2011 khan a boral tawh bawk a ni.

Vanhlupui vuinaah hian All India Radio (AIR) Aizawl Station Director leh Cluster Head, DR. Lalropuia chuan Zofate zinga All India Radio Top Graded Artist thlahliam a ni ta mai chu All India Radio-a thawktuten an uiin an hre reng dawn tih a sawi a. Vanhlupuii chu August ni 19, 1999-ah All India Radio Top Graded Artist-a hlan kai a nih thu leh C. Lalkhawliana’n Vanhlupuii puala hla a phuah sak ‘Thuva awmhar’ hla, amah ngeiin a sak chuan sang takah Zofate zinga a rawn vawrh chho leh tih a sawi a. Vanhlupuii hi All India Radio-a hla 230 record thei a nih thu leh a hla record zinga 174 te chu Pathian hla a nih thu a sawi bawk a ni.

Chief Minister Lalduhoma pawhin zaithiam lar Vanhlupuii a ui thu hi Social Media lamah tarlangin, “Zofate tan channa nasa tak a ni,” a ti a. A kalsan tak a chhungte Pathianin awmpui se a duh thu a tarlang bawk. Home Minister K. Sapdanga pawhin Facebook-ah Vanhlupuii a ui thu ziakin, Mizo in ro hlu a chan thu leh a sulhnute chu hriatreng a nih tawh tur thu a sawi ve bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni