State sawrkar in Central a dawr hlawhtling lo niin sawi

BJP Mizoram Pradesh President Vanlalhmuaka'n Lalduhoma kaihhruai Mizoram sawrkar in Central sawrkar an dawr hlawhtling lo hle tih chu mipuiten an hria niin a sawi.

Nimin-a Aizawl Press Club-a thuthar thehdarhtute a kawmna ah BJP Mizoram Pradesh-a President leh Lok Sabha Inthlanpui neih tura an Candidate Vanlalhmuaka chuan Mizoram Chief Minister Lalduhoma leh a thawhpui ten sawrkar laipui an dawrin an hlawhtling lo hle nia sawiin, Khumbeu leh Mizo puan chi hrang hrang pe in thla an lakpui chu an thlen san ber niin a sawi a. State sawrkar Lalduhoma kaihhruaiin Central ah engmah sawi chhuah an nei thei lo nia sawiin, a zin haw a Press Conference-ah pawh hmasawnna tur an sawi chu hun hmasa lama hmalakna hlawhtlinna chauh a ni tih a sawi a, an zinna hlawhchham lanna chu ZMC-ah a chiang niin a sawi a. State inthlanah BJP chu Ar chuk tui lo khawpin sawichhiat a nih thu leh BJP inhlauh siakna in vote zawn thin a ni tih sawiin, Mizo mipuite chu hmasawn an duh chuan fin thiam a tul thu a sawi bawk a ni.

Vanlalhmuaka chuan sawrkar laipuia BJP hotute nen an inhmuhin Lok Sabha ah thlantlin a nih chuan Mizoram hmasawnna tur lian tam tak sawrkar laipuiin an tihsak dawn tih sawiin, Hmarchhak State-ah State President MP inthlana ding awmchhun a nih dawn thu leh thlantlin a nih chuan Central Minister a ni thei dawn tih a sawi a. Lok Sabha MP pakhat in Central sawrkar do a hlawk loh zia hrechiangtu chu MNF President Zoramthanga leh a thawhpuite an nih thu sawiin, BJP leh Hindu sawi zawm thin chu party dang ho au hla ber a nih thu a sawi a, Kristian Minister a awm theih nan amah vote tling turin mipuite a ngen a ni.

BJP MP Candidate chuan thlantlin a nih chuan PM Scheme hrang hrang mipuiten tangkai zawka an hman theih nan hma a la dawn tih pawh sawiin, Mizoram hmasawnna chu an ngaih pawimawh ber a ni tih a sawi a, Mizoram hmasawnna chu sawrkar laipuia hotuten an tiam tih a sawi bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni