Feb. 17, 2020 atanga tan Mizoram Legislative Assembly Budget Session tluang taka zawhfel a ni

February ni 17-a tan, Mizoram Legislative Assembly Budget Session chu nimin tlai khan zawhfel a ni ta a, Assembly Speaker Lalrinliana Sailo chuan Mizoram Assembly-a member te zawhna lut, Department thenkhatin an chhang hman lo chu a ngaihmawh thu a sawi.

Mizoram Legislative Assembly 8-na, rorel thutkhawm vawi 5-na hi Feb. 17, 2020 khan neih tan niin February ni 19 khan Finance changtu Chief Minister, Zoramthanga chuan kum 2020-21 Mizoram Budget a pharh a, budget pumpui, cheng vbc 10,715 chu nizan hmasa khan pass fel a ni. Tun tum Assembly rorel inkhawm hian ni 17 chhung a awh a, rorel inkhawm neih ni zat erawh ni 12 a ni thung a. Session tanni ah Larsap, P.S. Sreedharan Pillai-a'n House-ah thu a sawi a, a thusawi chungchanga lawmthu sawina Motion, H. Biakzaua putluh chu a tuk, February ni 15 ah sawihovin lungrual taka pawm a ni a. Session neih chhung hian member lo ni tawh mi pahnih, Dy Speaker lo ni tawh, Lalthankunga leh Govt. Dy. Chief Whip lo ni tawh, C. Sangzuala te sunna hun hman a ni a, lehkhapawimawh 13 chu House dawhkan-ah pharh a ni a, sawrkar Bill 6 lut te chu pass vek a ni a, Private Members Resolution pahnih pass a nih bakah Official Resolution pakhat pass a ni bawk.

Tun tum Session-ah hian Ziaka chhan chi, Unstarred Question 249 lut zingah 230 pawm niin 19 hnawl a ni a, chhanna dawn loh 20 a awm a, zawhna chhang hman loh te hi GAD atangin 14, Agriculture, Labour Employment, Skill Development and Entrepreneurship, Land Revenue, Social Welfare, Power & Electricity leh Finance Department atangin pakhat theuh a ni a. Hei bakah hian House chhunga chhan chi zawhna, Starred Question 439 a lut a, chung zinga 421 chu pawm niin 18 chu hnawl a ni tih Speaker, Lalrinliana chuan a sawi a, House chhungah 46 chhan a nih thu a sawi bawk.

Mizoram Legislative Assembly Speaker, Lalrinliana Sailo chuan Budget Session zawhfel takah Assembly House-a tawngkaa chhan chi zawhna Starred question lut zingah chhanna dawn loh 14 a awm tih sawiin, Health Department atangin chhanna an dawng hman lo chu an hman lo hrim hrim nge, chhan ngam loh an nei tih pawh hriat a ni lo tih a sawi a. Zawhna lut, chhanna an dawn hman loh dangte hi GAD chanah pathum, Commerce & Industries-ah 2, Planning-ah pakhat, Revenue-ah 3, Tourism-ah 1 leh Agriculture leh Sports-ah pahnih ve ve a ni tih a sawi bawk.