Village Level Child Protection Unit (VLCPU) hnathawh dan tur zirhona Serchhip-ah neih a ni

District Child Protection Unit (DCPU) hnuaia Serchhip khawpui chhunga Village Level Child ProtectionUnit te tan an hmalak dan tur an hnathawh dan tur zirhona chu nimin khan Serchhip DC’s Conference Hall-ah neih a ni a, District Bawrhsap, Sangchhin Chinzah chuan khuallian niin a hmanpui a ni.
Village Level Child Protection Unit (VLCPU) te tana an hnathawh dan tur zirhona hunah hian District Bawrhsap, Sangchhin Chinzah chuan kan ram leh hnam kalzelna atana naupangte chu an pawimawh thu sawiin, tunlaia naupangte chunga hleilenna thleng hriat tur a awm ta fo chu pawi a tih thu a sawi a, nu leh pate kan inthlahdah tak avanga heng thil hi hluar ta nge a nih a, tunhma pawha thleng fo \hin, kan khawsak phungte kan inhriatpawh tak zung zung avanga hre tam ta nge kan nih tih erawh ngaihtuah tham tak a nih thu a sawi a. Kan fate chunga thleng atana kan duh hauh loh thil tam tak naupang pawisawilo te chunga a thleng ta fo mai chuan mawhphurhna pawimawh tak leh tih tur \ul tak kan neih zia a tilang chiang hle tih sawiin, tuna naupangte a\ang hian kan ram hmel a lo la lang dawn a ni tih hriain, keini hian kan naupangte nun hi kan venpui a, kan ngaihtuah hi a \ul takzet a ni, a ti bawk.
Serchhip District Child Protection Unit-a Protection Officer, R. Lalramdinmawii kaihhruai he hunah hian District Child Protection Officer (DCPO), Lalsiampuii chuan Village Level Child Protection Committee (VLCPC) din anih dan leh an hnathawhte a sawifiah a. VLCPC chu Integrated Child Protection Scheme (ICPS) hnuaiah khaw tin leh Veng tina naupang venhimna kawnga hma la turin July 22, 2016-ah Mizoram puma khaw tin (Village Council/Local Council) awmna ah din vek a nih thu leh Serchhip District-ah hian VLCPC 50 din anih tawh thu a sawi a. VLCPC te chu an huamchhung \heuhah naupang enkawl leh venhim ngaite leh naupang dan kalha che te emaw, thil sual ti an lo awm chuan an chungchang lo ngaihtuah a, hma lo latu tur an ni tih sawiin, Child Welfare Committee (CWC), Juvenile Justice Board (JJB) leh District Child Protection Unit (DCPU) te nen thawkhoa, naupang venhimna atana theihtawpa mahni Veng leh Khua \heuha thawktu tur te anih thu a sawi bawk.
Social Welfare Department hnuaia Ser-chhip District Child Protection Unit (DCPU) hian VLCPC training hi 2016 a\ang khan District chhunga khaw hrang hranga an kalpui \an a, Serchhip Town Area leh Thenzawl leh a chhehvel khua te tih loh chu an khuaah kalchilhin training hi pek vek an ni a, VLCPC 50 zingah khaw 5 chauh training pek hmabak an nei tawh a ni.
Nimin a training-ah hian Serchhip khawpui chhunga Village Level Child Protection Committee (VLCPC) Member te telin Liansangpuii, Protection Officer (INC) chuan Integrated Child Protection Scheme (ICPS) nihphung leh an hnathawh te sawifiahin District Child Protection Officer, Lalsiampuii chuan kumtlinglo pawikhawih te hremna pek theihna dan, Juvenile Justice (Care and Protection of Children) Act, 2015 chungchang leh VLCPC nihphung, an hnathawh tur leh an mawhphurhna te zirtirin Lalramsiami Sailo, Legal cum Probation Officer chuan hursualna laka naupangte venhimna dan POCSO Act chungchang a zirtir bawk a ni.

Popular News

Retailer bukna diklo 3 man

MZU-a VC tur ruat thar a ni

Hmeichhia te hmasawnna tura hmalakna chungchang thlirho.