ZEP buatsaihin Serchhip-ah rualbanlo chhungte tan rualbanlote enkawl dan chungchang zirho a ni

Zoram Entu Pawl (ZEP) buatsaihin nimin khan Serchhip-a rualbanlo chhungte tan rualbanlo te enkawl dan leh anmahni chhawmdawl theihna tura hmalak dan tur hrang hrang zirhona neih \an a ni a, Vawiin ah chhunzawm lehin zawhfel a ni ang.
Zoram Entu Pawl (ZEP) hnuaia Community Based Rehabilitation (CBR) Project chuan Chennai-a awm National Institute for Empowerment with Multiple Disableities (NIEPMD) nena \angkawpin he zirhona hi Serchhip P&E Veng-a St. John the Baptist Hall-ah an buatsaih a. He zirhona ah hian rualbanlo nu leh pa leh an chhungte bakah anmahni enkawltute leh rualbanlo te tana ding pawl aiawhte an tel a. He training hi SSA Mission Serchhip District-a Deputy District Project Coordinator, R. Lalawmpuia chuan khuallian nia hmanpuiin rualbanlo kan tih te chu sorkar in a ngaih pawimawh thu leh an ham\hatna tur hrang hrangte pawh a duan thu a sawi a, heng ham\hatna an dawn theih te hi anmahni enkawltute pawhin an hriatchiana an ngaihven a pawimawh thu sawiin, sorkar hmalakna avang hian rualbanlote pawh an chhungte tan phurrit an ni lo tih a sawi a. Rualbanlo te chu mi pangngai anga en-a kaihruai turin mitin ten mawh kan phur tih sawiin, engkim hi Pathian in a ropuina puanchhuahna atana a siam te an ni tih hriat reng a pawimawh thu a sawi bawk.
SSA in rualbanlote tana hma alakna hrang hrangte pawh sawiin SSA Mission Serchhip District-a Dy. DPC chuan, naupang kum 6 a\anga kum 14 te chuan zirna an dawn vek theih nan hma an lak thu leh heng zirlai naupangte hriselna dinhmun enfiahna hun te buatsaihin an mamawh ang damdawi leh thildang te pawh a thlawna pek an nih \hin thu a sawi a. Zirna In hrang hrangah Ramp te siamin inthiarna leh an chetvel awlsamna tur thil hrang hrangte ngaihtuaha siam a nih thu a sawi bawk.
Zoram Entu Pawl CBR Coordinator, Teressa Lalrinkimi kaihhruai he hunah hian ZEP Incharge, Fr. Gabriel Laltlanthanga chuan mihring te chu khingbai nihna nei vek kan nih thu sawiin, rualbanlo te chu an theihna neih te an lantir theihna tura kaihhruai an \ul thu a sawi a. ZEP hnuaia din Disable People Organisation (DPO) Beiseina Nghaktu-a President, Lalhriatpuia pawhin he hunah hian thu a sawi bawk. Ni 2 awh tur he zirhona ah hian Lalremsangi, Block Resource Person leh Teressa Lalrinkimi, Coordinator, CBR ten thupui thlanbik hrang hrang hmangin rualbanlo chhungte leh anmahni enkawltu bakah Disable People Organisation (DPO) hrang hranga hruaitu an zirtir dawn a ni.

Popular News

Mizoram-ah Faina Hapta hman \an leh a ni

Retailer bukna diklo 3 man