Sairang Rel service khaihlak

Niminpiah tlai lama ruahsur nasa avangin Jamira (Assam) leh Bairabi (Mizoram) inkara Rel kawng hrulah lei a min avangin Rel tlan turte chu tihtawp lailawk a ni.
Northeast Frontier Railway (NFR) thuchhuakin a tarlan danin leimin hian Rel kawng lai atanga teha meter 40 vel huamin helai hmun hi lirthei luh theihna a nih loh avangin siamthat hna thawh kawngah harsatna a awm a, Rel kawng chhia siamthat hun chhung hi a rei dawn niin an tarlang. He leimin hian Sairang atanga zin chhuak leh khualzin rawn lut turte a nghawng nasa hle a. Sairang-Guwahati Express chu Bairabi-ah tih din niin Sairang-ah let tir a ni a. Passenger 900 vel zet chu Sairang-ah tangkhangin NFR chuan an thlen tumna an thlen theih nan Bus 16 a ruahman sak nghal a ni.

Hei bakah hian Silchar-Bairabi Rel pawh Jamira-ah tih din niin passenger-te pui turin lirthei ruahman a ni a, Guwahati-Sairang Service pawh Hailakandi-ah tihtawp a ni bawk a. Rel thenkhat chu tlan tir loh a nih bakah Hailakandi atanga chhuahtir te a awm bawk a ni.