Tun Term chhungin kawlphetha hman man an tipung dawn lo tih Chief Minister in a saw

Chief Minister, Lalduhoma'n, ZPM kaihhruai Sawrkar chu an thutiamah an ding a, sum-a an harsa hle chungin kawlphetha hman man an la tipung lo a, tun term chhungin an tipung dawn lo tih sawiin, Smart Meter hman hnua Electric Bill sang chu chhan hrang hrang a awm thei tih a sawi bawk.

Nimin-a Assembly thutkhawm ah East Tuipui Bialtu MLA Ramthanmawia'n Calling Atention hun hmangin Electric Meter chungchang a sawi chhuak a. Sawrkar laipuiin kawlphetha pekna hmanruate tihchangkan leh thuamthatna turin kum 2021 July thlaah RDSS a tlangzarh a, he Scheme hnuaiah hian ram pumah Smart Meter hman tura tih a nih angin Mizoram-ah pawh nikum atang khan Satnam Global Infra Project Ltd. hmangin Smart Meter hi vuah tan a ni a. Kumin kumtir atangin Smart Meter vuah tawh Consumer-te tan Smart Reading hmanga Bill siam tan niin Bill thar chu mi tam tak phurrit leh manganna thlentu a ni tih a sawi a, Smart Meter hmanga Bill siam tawh chinah Bill san avanga complaint a tam thu sawiin, a hmaa Bill let thum, let li laia tam chawi te pawh an awm niin a sawi. Hei bakah hian Ramthanmawia chuan ZPM kaihhruai Sawrkar-in Eng chhit man an tihsan loh thu an sawi mek laiin a rukin an tisang reng em ni tih leh Smart meter atanga Eng chhit man sang tak lak chu Sawrkar sum tuak nan ruahman a ni zawk em tih chu a zawhna a nih thu a sawi a. Sawrkar chu mipuite harsatna leh manganna chu bengkhawn a, Smart Meter chu hman chhunzawm zel a nih hmaa Bill san vak vak chhan enchiang a, siam that dan ngaihtuah turin a ngen a ni.

India hmarchhak-a Power Minister ten nimin-a Union Power Minister hova thutkhawm an neih avangin P&E Minister F. Rodingliana a tel thei lo a, a aiawhin House Leader Lalduhoma chuan Smart Meter chungchang hi sawifiahin, Smart Meter vuah hma aia vuah hnua Bill sang ni-a sawi chu chhan hrang hrang a awm a, tuna Meter hmanlai chu dik tawk lo a tam a, Meter hlui dik tawk lo thlaka Smart Meter vuah a nih hnuah Bill dik tak chawi tur a lang ta a, hei vang hian Bill chu a san phah angin a lang ta tih a sawi a. Hei bakah hian Manual-a Reading laknaah tih dik loh palh a awm theih thu te sawiin, Smart Meter chu kawlphetha hman kawngah dikna leh langtlang taka kal a nih theih nan a tangkai thu te pawh a sawi a. Kawlphetha hman man chu ZPM in an la tipung lo tih sawiin, tun Term chhungin an tipung dawn lo tih a sawi bawk a ni.