MUHCS 2.0-ah damlo enkawlna vbc. 74.60 pe tawh
MUHCS 2.0 hi April 1, 2026 atangin hman tan a ni a, he Scheme thar hian chhungkaw tin inenkawlna atan kum khatah cheng nuai 5 thleng a huam a, damlo inenkawlna senso phurrit chhawk zangkhaina tura duan a ni. Zalen tarlan danin, MUHCS 2.0 hman tan atanga August ni 19, 2026 thleng khan damlo (beneficiary) 25,156 te inenkawlna cheng Vbc. 74.60 Mizoram sawrkarin a seng tawh a. MUHCS 2.0 hnuaiah chungkaw 49,927 inziaklut an awm a, hei hi MUHCS 1.0 hnuaiah inziaklut chhungkaw 20,198 aiin an tam zawk a. MUHCS 2.0 hnuaiah hian sawrkar hnathawk mi 35,325 inziaklut awmin, pensioner inziaklut 11,928 an awm a, AM-PMJAY (Golden Card) nei 2,22,943 an awm bawk. MUHCS 2.0 hi mi nuai 12 velin an hmang thei dawn nia ngaih a ni
MUHCS thawktute chuan MUHCS 1.0 ai chuan 2.0 zawmtu an pun thu hi sawiin, General Category-ah phei chuan a let aia tamin an pung niin an sawi a. Kum kalta khan 20,198-in an zawm laiin kuminah chuan 49,927 in a zawm thu an sawi a. Sawrkar hnathawk leh pensioner te chu che reng a nih avangin figure dik tak hriat theih a nih loh thu leh AB-PMJAY chu a hranpa a inziahluh ngai lo a nih avangin a danglam lo niin an sawi.
Tarlan tawh angin Mizoram chhunga mimal leh Kohhran enkawl damdawi In 19 bakah Mizoram pawna Private/Trust/Mission Hospitals 52 ten MUHCS an zawm tawh a ni.