Lung In tang zinga za zela 98 hi Drugs leh a kaihhnawih avanga tang an ni - Chief Minister
Chief Minister Lalduhoma chuan Inrinni khan Tawngtai Bethel Camping Centre, Sakawrtuichhun-ah Banakaih (Handholding) Scheme hmanga Campers 80 atanga 90 vel lenna tur Camping Centre sak thar, Jesaia Room chu hawngin he hunah hian Chief Minister chuan Lungin tang zinga za zela 98 chu Drugs leh a kaihhnawih avanga tang an nih thu leh a tam zawk chu Drugs zawrh vanga tang an ni ber tih sawiin, za zela mi 41 te chu an tang nawn nghe nghe tih a sawi a. “Chutiang dinhmuna kan din avang chuan ruihhlo avanga hliam tuarte chhawmdawl hi kan ngai pawimawh a, Hulhliap Short Stay Centre-te kan din a, mi 192-te hnenah Skilled Training neih tirin, tunah hian mi 21 hnenah Banakaih (Handholding) Scheme kaltlangin eizawnna bultanna kan pe hial a ni,” a ti a. Eizawnna mumal neih loh chuan tlukna ngaiah an tlu nawn fo thin tih hre reng chungin sawrkar chuan heng ruihhlo ngai enkawlna dawng chhuak tawhte hi an thiam zawng thil (skill)-ah training pein Banakaih Scheme hnuaiah an dam khawchhuahna atan tan a la tihna a nih thu sawiin, “Ngawl vei sim tawh, Jail tang chhuakte pawh training pek zel hi tha ka ti a, Kohhran, khawtlang leh NGO hrang hrangte thawkko zelin chhunzawm zel dan kan dap dawn a ni,” a ti a. “Aftercare facility hi duh angin kan la nei tam tawk lova, Kohhranho nen tangruala din hi tha ka ti a. Pathian rawngbawlna atana hmanga duat taka heng tanpui ngaite lo tuamhlawm duhtu Kohhran chu thawhpui a, sum leh pai-a puih a, a Management hi Kohhran kutah hlan hi a tha ka ti a ni,” a ti bawk.
Chief Minister chuan kum 2023-a Chief Minister-a lakluh a niha a tlawh hmasak ber chu TBCC hi a nih thu leh tun hi vawi thum a tlawhna a nih thu sawiin, “Tunah chuan in lo changtlung ta hle a, inthiarna leh kawt zawl tha tak in nei a, Choka in nei hrang vek bawk a, in hmasawnna te hmuh a nuam hle mai. Sawrkar pawhin sum a neih ang angin ruihhlo ngaite chhawmdawl hna hi kan thawk a, TBCC ngei pawh hei kan hmuh angin Mosia Room kan sa tawh a, tunah Jesaia Room kan hawng leh ta a. Heng kan hmalakna ah hian Central YMA ten min thawhpui tha thin a, kan lawm hle a ni,” a ti a. “He Camp-ah hian mi 805 in awm mek a, thawktu tlemtein fel taka in enkawl thei hi a ropui ka ti a. In inpekna thukzia a lang a ni. TBCC vawi hnih lai a function loh tum khan Aizawl khawpui tan a buaithlak hle a, tun atan chuan TBCC tel lo hian kan khawsa thei lo a ni,” a ti bawk.
Tawngtai Bethel Camping Centre-a Jesaia Room hawnna hun hi Central YMA Vice President, Prof. Lalnuntluanga chuan kaihruaiin Central YMA President R. Lalngheta chuan Camper-te chu TBCC atanga hlawhtling taka an chhuah hnuah an Veng YMA-ten an lo lawm dawn tih hrilhin, kawng hlui zawh tawh lova, nunna thar nena chhuahsan ngei turin a chah a. TBCC Founder TT. Zohmingthanga pawhin Chief Minister Lalduhoma'n TBCC a ngaipawimawh thin avangin lawmthu sawiin, “Tunhnaiah pindan thar pahnih sawrkar tanpuinain kan han nei thar a, damlo tam zawk kan enkawl theih phah dawn a, chhungkaw tam tak tan malsawmna a ni dawn a ni,” a ti bawk.
He hunah hian Central YMA Treasurer Er. H. Duhkima'n Room thar sak chungchangah Report pein Jesaia Room hi June ni 23-ah sak tan niin August ni 15 khan sak zawh a ni a, cheng nuai 14.58 sen a ni. A sakna sum hi sawrkarin a tum a, a sak hna hi Central YMA in a buaipui a, Campers ten tha an thawh thin a ni. Hemi hmalam kumin March thla khan Mosia Room chu sak alo ni tawh a, thla khat leh ni 22 chhung sain cheng nuai 13.82 sen a ni.