Mizoram-a naupang 102,823 te hnenah July thla chhungin Zeng hri danna pek tum a ni

Tun thla July 2026 chhung hian Mizoram chhunga naupang 102,823 hnenah zeng hri danna, Pulse Polio Vaccine pek tum a ni a, a bultanna hi July ni 1, 2026-ah Directorate of Health Services Office-ah Health Minister Lalrinpuii chuan a hawng ang.
Zeng hri (Polio) hi taksa chak lohna thlentu leh nunna atana hlauhawm tak niin, a hrik hian Thluak leh hriatna thazam (spinal cord) khawihin taksa che thei lova siamtu anih bakah a chang phei chuan thihna hial a thlen thei a. Ruahman dan chuan Zeng hri danna, Pulse Polio Vaccine hi naupang kum 5 hnuailam hnenah pek tur niin State thenkhat ah chuan pek a ni tawh a, Mizoram-ah erawh chuan July atangin kalpui tan tum a ni. Tun tuma Zeng hri danna pek turah hian Mizoram chhunga naupang 102,823 chu target an niin Booth 1433 siam tum a ni a. Khaw 949-a chhungkaw 268,925 bakah ramdang nena inkalpawhna laiah te beihpui hi thlak tum a ni a. Vaccine hi June ni 11, 2026 khan a lo thleng tawh a, District hrang hrangah pekchhuah a ni tawh a ni.

Mithiamte sawi dan chuan Zeng hri danna hi chi (type) chi thum awmin heng zinga Type 2 chu pek a ngai tawh lo a, tun tumah hian Zeng hri danna Type 1 leh Type 3 te pek an ni dawn a. Hri danna hi naupang ka-ah thlawr tur a ni. Type 2 bik hi pek a nih loh chhan chu kum 1999 khan umbo (eradicate) anih tawh vang a ni a. Zeng hi mi in a vei tawh chuan tihdamna a awm lo a, amaherawh chu invenna (vaccine) lak anih chuan ven theih a ni thung tih an sawi bawk.

Zeng laka beihpui thlakna hi kum 1988 khan India ramah kalpui tan a ni a. India rama Zeng hri vei hmuhchhuah hnuhnung ber chu January, 2011 kha niin Howrah, West Bengal-ah hmuh a ni a, a bak hmuhchhuah a awm loh avangin kum 2014 khan India ram chu zeng hri vei awm lohna ah puan a ni a. Mahse ram thenawm Afghanistan, Bangladesh, Pakistan leh Myanmar-ah hri vei an la awm avangin Zeng laka inven beihpui hi thlak chhunzawm zel a ni thung. Mizoram pawh Bangladesh leh Myanmar ramri a awm a nih avangin hri ven beihpui thlak hi sawrkar laipuiin a ngai pawimawh hle a. India thenawm ramte hi ram changkang lo tak tak an nih avang leh politics thila mumal lohna a awm avangin hri venna hi an kalpui mumal lo a. Hei mai bakah ramri chhehvela awmte nasa taka an inkalpawh bawk si avangin hri ven beihpui thlak hi sawrkar chuan a ngai pawimawh hle a ni.

Mizoram chhung hmun thenkhat, a bikin Lawngtlai leh Siaha District khaw thenkhat chu thawktu indaihloh vang te, a mi cheng ten invenna lak an ngaih pawimawh loh vang leh inkalpawhna lamah harsatna a awm avangin hri venna pek kawngah harsatna a awm thin nia thudawn a ni.