Mizoram leh Assam in inbiakna an nei dawn hnai

State pahnih ramri kaihhnawihah Mizoram leh Assam sawrkar aiawhte chu Dawhkan kilin an inbe leh dawn hnai tawh nia sawi a ni a. Mizoram chin-a Police duty-na Border Out-post panna kawng tha lo chu sawrkarin Fur ruahtui tlak tlem deuh veleha siamthat tumin a inbuatsaih mek bawk.

Home Minister K. Sapdanga chuan thuthar thehdarhtute zawhna chhangin State pahnihin ramri chungchanga inremna an neih theihna turin sawrkar pahnih aiawh an inbe leh hnai tawh a, tun tum hian Aizawl-ah inbiakna neih tum a ni. Kumin April thla-a Assam-a MLA inthlanpui neih hma khan an ni lam hian inbiak an rawn rawt a, inthlan kaihhnawih engemaw ken tel a neih an hlauh avangin an lo pawm lova, hun reilote hnuah State pahnih aiawh hi an inbiak theih a beisei tih a sawi a ni.

Hetihlai hian Assam leh Mizoram inrina bulhnaia Mizoram Police duty-na hmun thenkhatah inkalpawhna tha lo awm chu siamthat thuai tum a ni tih Home Minister chuan a sawi a, Kolasib District Bawrhsap hnuaiah heng kawng thawmthatna tur hi cheng nuai 45 vel dah a ni a, a huna hna thawktu tur koh hman a nih tak loh avangin an thawk mai lova, Fur-in a rawn nang zui ta tih a sawi a. Home Department atangin kawng thawmthatna tur hi ruahman turin an ti a, cheng vbc. 5 chuang daih ruahmanna chu sawrkar sum dinhmun nen a sang deuha an hriat avangin tihniam turin an ti leh a, cheng nuai 30-35 vela thawmthat theih dan ngaihtuah niin khua a that veleha hna tan theih turin an inruahman tih a sawi a ni.

Kum 2021 July-a Mizoram leh Assam-in ramri kaihhnawiha tualthu chhia an neih hnuah State sawrkar pahnih aiawh hi tum 5 vel an inbe tawh a, Minister Level leh Commissioner/Secretary Level-ah te a ni a. Minister Level-a inbiak hnuhnung ber chu August 9, 2024 kha niin hemi tum hian February 9, 2024-a State Chief Minister pahnih ten an inkarah inhriatthiamna leh duhsakna nena ramri buai chinfel a nih theihnan inpekna nghet tak nena hma lak thin nise tia thu an dah chu nemngheh nawn niin, hemi tuma inbiakna pawh hi ramri sawifel tum lam aiin chumi kawng zawhna atan ‘Goodwill Mission’ tia vuah a ni zawk a. He inbiakna rahchhuah chu, State pahnih inrinaa District thuneitute ruahman angin infiamna leh thildang hmanga intlawhpawh tawna hun hman ho tam lam hawi a ni.

Inbiakna hnuhnung ber erawh April 25, 2025 khan Guwahati-ah Secretary Level-a neih a ni thung a. Mizoram atangin Home Secretary Vanlalmawia hovin palai 7 an kal a. Tunhnaia thuthar thehdarhtute a kawmna ah zawhna chhangin Chief Minister Lalduhoma chuan, Assam Chief Minister Himanta Biswa Sarma nen an lo inkawm tawhnaah an pahniha Chief Minister an nih dun chhung chuan ramri kaihhnawiha intihbuai loh hi tawngka in thu an thlung dun tih a sawi a ni.