Mizotaxi app inbuatsaih zel

Online hmanga Taxi leh Auto Rickshaw koh theihna tura duan ‘MizoTaxi mobile app’ chu thla thar July ni 1 atanga hmang tan turin inbuatsaih mek a ni a, nimin thleng khan MizoTaxi mobile app-ah hian lirthei 93 an in register tawh a; he app hi Aizawl khawpuiah a bultan nan hman tur niin mi 10,172-in an download tawh a ni.
Transport Department hotute chuan, MizoTaxi mobile app atan hian Aizawl khawpuia Two Wheeler Taxi, Four Wheeler Taxi leh Auto Rickshaw service mekte tan tun thla chhungin register-na hun hawn a nih thu an sawi a; nimin tlai thleng khan he MizoTaxi mobile app-ah hian Four Wheeler Taxi 52 leh Two Wheeler Taxi 41 in register tawhin, an vaiin lirthei 93 an in register tawh a; Auto Rickshaw in register an la awm lo thung a. Nimin thleng khan mi 10,172-in MizoTaxi mobile app hi an download tawh a ni.

Transport Department hotute chuan Mizorama mihring phur chi lirtheia sumdawng ten sawrkar pawmpui chuan man (approved rate) dik tak an hman theih nan MizoTaxi mobile app hi duan a nih thu an sawi a. Sawrkar bituk aia tam an chawi thin avanga mipui phunna leh khualzin ten Mizoram-a Taxi chuanman sang lutuk an sawisel thinna te chu he app hian a sutkian ngei an beisei thu an sawi a; Aizawl khawpuiah bultan tur a ni a, a tahtawlin District dangah pawh kalpui zel tum a nih thu an sawi a ni.

Mizotaxi app hi Mizoram sawrkar leh Digiride Technology, NIT, Mizoram te duan a ni a, Playstore leh Appstore atanga download theih a ni. Tun dinhmunah MizoTaxi mobile app-in a hman tur lirthei chuanman hi kum 2024-a sawrkar bituk hman tur a ni a; Two Wheeler Taxi-ah km 1 chinah Rs. 30 niin a hnu lamah km 1 zelah Rs. 20-in a pung a. Auto Rickshaw chu km 1 chinah Rs. 35 niin a hnulamah km 1 zelah Rs. 25-in a pung a; Four Wheeler Taxi chu km 1 chinah Rs. 55 niin km 1 hnulamah chuan km 1 zelah Rs. 45-in a pung bawk a ni.