Mizoram State Museum tlawhtu pung hretin kumin ah mi 657 ten an tlawh tawh

Mizoram State Museum, Aizawl-a mi chu COVID-19 hri leng vanga tlawhtu an tlem hnuah tunhnai atang khan tlawhtu ziaawm leh deuhin kumin thla hnih chhungin tlawhtu mi 657 an awm tawh.

Thudawn danin COVID-19 hri len hma kha chuan Mizoram State Museum hian State chhung mai bakah State pawn atang pawhin tlawhtu an nei nual thin a, amaherawh chu kum 2020-a COVID-19 len hnuah erawh tlawhtu an tlem chho viau a. Nikum lam atanga hri leng a ziaawm chhoh hnuah tlawhtu pawh hi an pung chho ve leh hret hret a, kumin chhungin tlawhtu hi mi 657 an awm tawh a. Heng zinga 348 chuan January thla khan an tlawh a, February thla chhungin mi 309-in an tlawh leh bawk a ni.

Mizoram State Museum thawktute chuan Museum-in Museum Week an hman laiin tlawhtu chu an tam ber thin tih sawiin, tunhnaiah erawh Thlasik khaw vawh avang leh School naupang exam lai a nih avangin tlawhtu an tlem niin an sawi a. Museum tlawhtute ngaihhlut leh en pawh an tui dan azirin a inang lo thin hle tih Mizoram State Museum thawktute chuan sawiin, a tlangpuiin hmanlai bungruaten tlawhtute lung a tileng ber nia an hriat thu an sawi a. State dang atanga tlawhtute pawhin hmanlai Mizo thil hlui chu an en ber leh hmuhnawm an tih ber niin an sawi bawk.

Nikum kumtawp lam thleng khan Mizoram State Museum hian objects 3911 neiin chung zinga 723 chu Showcase 100-ah an phochhuak mek a; hengte hi a tul dan a zirin an sawn kual thin tih an sawi bawk a. Museum-a dah tur object-te chu hmunhmain a daih loh avangin an chep hle a, a thar pawh an chah thei hrih lo nia sawi bawkin tunah hian Reserve Collection-ah bungrua engemaw zat an dah mek niin an sawi bawk a. Tribal Museum, Ranchi-ah te, Bhopal Museum-ah te, Silpigram Museum, Guwahati-ah te, Jawaharlal Nehru Museum, Itanagar-ah te Mizo hnam hmel lanna Museum Objects engemaw zat thawn (Donate) a ni tawh bawk.

Mizoram State Museum-a luh man hi puitling pakhat tan Rs.20 /- leh naupang pakhat tan Rs.10 /- a ni a. School naupang zirtirtute hruaia Educational Trip-a kalte chu 50 % concession pek an ni a. Kum upa, kum 65 chin chung lam te chu en man chawitir an ni lo bawk.