LC te lawmman pek tum

Aizawl khawpui a Local Council 83 te chuan April 2022 atang khan hlawh/lawmman an la tawh lo a, April atanga October, thla 7 chhung hlawh hi November thla tirah AMC chuan pek an tum a ni. Aizawl Municipal Corporation (AMC) thawktute sawi danin nikum August thla atang khan AMC chuan sawrkar atangin ULB leh pawisa dang dawn a la nei lo a. Kumin March thla thlenga an lawmman/hlawh pawh AMC sum awmsa atanga pek niin tun tumah pawh hian AMC sum neih sa atangin Local Council te lawmman hi pek an ni ang. AMC huam-chhungah hian Local Council 83 awm mekin thla khat-ah Chairman in Rs. 1500/-; Vice Chairman in Rs. 1200/-; Treasurer in Rs. 1100/- leh Member in Rs. 1000/- lawmman lak tur an nei a ni.