MZP in Pension kum hman mek tha la ti

Mizo Zirlai Pawl (MZP) chuan Mizoram sawrkar hnuaia hnathawkte pension kum tuna hman mek chu tha an la tih thu an sawi.

MZP General Hqrs. Executive Meeting vawi 608-na chu nimin khan Aizawl-a MZP Conference Hall-ah neih a ni a, Meeting chuan Mizoram sawrkar hnuaia hnathawkte pension kum tihsan tumna awm mek chuchang sawiho in, tuna hman mek kum 60 chu tha an laa tih thu sawiin, thalai hna zawng mek leh dil mekte tan kawng zau zawk a in hawn zel theih nan pension kum tisang lo turin Mizoram sawrkar a ngen nghal bawk a ni. Hei bakah hian tunhnaia Mizoram Subordinate Services Selection Board (MSSSB)-in Combined Graduate Level Examination a buatsaiha hna hrang hrang a lakah, Mizo dik tak tling leh tlak an awm laia hnamdang pathum lak tel an ni chu pawi an tih thu sawiin, tunhnuah Mizoram sawrkar hnuaia hna lak reng rengah a tling leh tlak rau rau zingah ram leilungfa, Mizo dik tak duhsak zel tawh tura ngenin, a tul angin enzui zel an tum thu an sawi bawk.