Kum 2028-ah Mizoram State Super-Specialty Cancer and Research Centre peihfel hman beisei a ni

Japan International Cooperation Agency (JICA) Survey Team te chuan Mizoram State Super-Specialty Cancer and Research Centre (MSSSCRC) sakna thawh thuai a nih theih nan Survey uluk takin an tan tawh tih sawiin, kum 2028 kum tawpah chuan MSSSCRC hi a mamawhtute tana hman theih a peihfel beisei a ni.

Japan atanga Mizoram-a lo kal Japan International Cooperation Agency (JICA) Survey Team leh an thawhpuite chuan nimin khan Raj Bhavan-ah Governor Hari Babu Kambhampati chu kawmin he thu hi an sawi a, he hunah hian JICA Survey Team aiawhin Hiroshi Ako, Team Lead of JICA Survey Team bakah Hospital Management-a Expert Hanako Miyoshi, IT Consultant Survey Team atangin Dr. Ranga leh Dr. Lalbiakmawia Ngente, Consultant, Survey Team te an tel a. Governor hnenah hian Hiroshi Ako chuan Mizoram State Super-Specialty Cancer and Research Centre (MSSSCRC) sakna thawh thuai a nih theih nan Survey uluk takin an tan tawh tih sawiin, Survey an kalpui dan te, MSSSCRC sak an tum dan te, MSSSCRC sak zawh hmaa State Sawrkar lam atanga a thawktu tur lo lak leh thil pawimawh dang lo chinfel ngai chungchang te leh he project kaihhnawih a hriattur pawimawh te a sawifiah a. MSSSCRC project chu a tha thei ang bera duan a nih thu te, an uluk thu te leh Project siam chhungin State sawrkar leh mipui lam atanga thlawpna an la mamawh zel tur thu te pawh a sawi a ni.

Governor Hari Babu Kambhampati chuan Mizoram mipui ten Cancer Damdawi In tha bik a neih theihna tur sum leh Thluak sengtu JICA Official te leh JICA Survey Team chungah Mizoram mipui aiawhin lawmthu a sawi a. JICA Team te chu Zoram mipui leh sawrkar chuan an hmalakna ah thlawp tlat an tum a, State sawrkar lam atanga tihtur tul te pawh Mizoram sawrkar chuan tha taka a tih tur thu a sawi a ni.

Governor chuan vanduai thlak takin Mizoram-ah Cancer vei an tam hle tih sawiin, heng Cancer vei zinga a tam zawk hi damdawi In changtlung zawk, Delhi, Mumbai, Vellore, Kolkata leh hmundangah te kalpui an ngai tlangpui tih a sawi a. Cancer inekawlna senso a hautak thei hle a, MSSSCRC sak zawh hunah erawh chuan Cancer vei te tana senso sang lutuk chu a ziaawm tawh dawn hle a ni, a ti. Mizoram mipuiin he Cancer Damdawi In changtlung tak hi mamawhna a san tawh a vangin a hun taka sak zawh hmana, hman thuai kan nghak hlel hle a ni, a ti bawk.

JICA Survey Team report danin tunah hian Survey hna kalpui mek a ni a; hei hian kum 2 emaw a la duh tura chhut a ni a. Kum 2028 kum tawpah chuan MSSSCRC hi a mamawhtute tana hman theiha peihfel beisei a ni.