Fall Armyworm in Serchhip District-ah khaw 23-a Vaimim chin te a bei tawh

Tunlaia Mizoram-a Vaimim ei chhe mektu pangang, Fall Armyworm chuan Serchhip District chhunga khaw hrang hrang 23-a Vaimim te a ei chhe tawh a, Agriculture Department chuan heng Pangang hi tirem turin theihtawp chhuahin hma an la mek a. Rannung thahna hlo tam tham tak semchhuah a ni tawh bawk.

Fall Armyworm puang mek chungchangah hian nimin khan Serchhip-a thuthar lakhawmtu \henkhat chuan Serchhip District Agriculture Department-a hotute an Office-ah an kâwm a, Agriculture Department hotute chuan tun thlenga report an dawn ang chuan Serchhip District chhunga khaw 23-a chhungkaw 420 te Vaimim chinna Hectares 112.52 (hectare 1 hi \in 2 hmun vel a ni) chu Fall Armyworm hian a khawih tawh tih an sawi a, Pangang tirem tur hian hma lak mek a nih thu sawiin, a kahna tur damdawi te pawh loneitute hnenah sem chhuah mek a ni tih an sawi a, hemi atan hian Chlorpyriphos, Tricel bur 262, Force bur 1050, Dichlorvos Nuvan bur 981 leh Rogo bur 30 chu Loneitu te hnen ah pekchhuah a nih tawh thu an sawi bawk.

Agriculture Department hotute chuan tuna Pangang puang, Fall Armyworm hian Vaimim chauh lo, thlai dang pawh a ei duh zel avangin Vaimim emaw, thlai dang pawh nise Pangang-in a khawih hmaa damdawi hmanga thlai lo vên lâwk chuan nasa takin thlai a chhan theih thu an sawi a. Hetiang Tur hmanga Pangang kah avang hian Pangang hi thi nghal tawp tawp tur a nih loh thu leh Vaimim hnah ah hian a Tur hi lutin chumi eitu Pangang chu a hnua thi leh tur zawk a nih thu an sawi a. Heng Tur an semchhuah te hi Department mithiam ten a pawlh dan tur an tih anga pawlh a nih chuan chawlhkar 2 chhung vel chu thlai hnah chu mihringin ei rih loh tur a ni tih an sawi a, pawlh dan tur an tih aia tama pawlh phei chuan hei aia rei zawk hi ei loh a \ul thu sawiin, tunah hian loneitu te hian thlai dang an la thar vaklo chuan Pangang laka hmalak a tih awlsam thu an sawi a Pangang te chu kut-a thah chu a \ha ber tih sawiin, Pangang te chu chhun lamah an vahchhuah ngai loh thu leh zan lamah thah a awlsam thu an sawi bawk.

Serchhip DAO, C. Lalnithanga chuan tunah hian Vaimim chu a thar ala hun loh avang leh a chin hun ala nih mek avangin mipuite tan chi-ai na tur a awmloh thu sawiin, Fall Armyworm avanga Vaimim chhia te hian Vaimim an ching leh duh a nih chuan Vaimim chi hi quintal 1 chuang chhek-khawl an neih thu leh hei hi a lak theih bakah Pangang beihna tur damdawi pawh lak theihin an kawl reng tih a sawi a, Pangang vanga harsatna tireh tur hian an Department chuan hma an la zel dawn tih sawiin, chutihrual chuan a taka Pangang tirem tura thawktu tur tak tak te chu loneitute an nih dawn avangin loneitute pawhin \an an lak hle a \ul tih a sawi bawk.

Serchhip DAO chuan Fall Armyworm thehdarhtu Phengphehlep te chu pem \hin leh zankhat ah pawh KM 100 te thlawk thei an ni tih sawiin, tunah hian India ram leh Mizoram te an rawn thlawk thleng ve ta tih a sawi a. |umdang ah pawh rannung dang puang a awm \hin thu leh tun hi thil danglam em em a nih loh thu a sawi bawk.

Agriculture Department hotute hnen a\ang thu dawn danin kum 2016-2017 chhung khan Serchhip District chhunga ram Hactare 1600-a zau ah Vaimim hi chin niin Metric Ton 2000 vel thar a ni a, kum 2017-2018 ah Hactare 1560-a zau ah chin leh niin Metric Ton 1918.5 thar leh a ni bawk a. Kumin a Fall Armyworm in Vaimim chin te a beih tak avang hian Rapid Response Force Team pali (4) siamin, heng Team hrang hrangte hian Serchhip District chhung khaw tin an fang tawh a, April 24 a\anga 28 chhung khan khaw hrang hrangah hemi chungchang Training chu a thawh khatna atan neiin tunah hian a thawh hnihna atan training hi neih leh tum mek a ni bawk.