Lenkawl

Tunkar Zirtawpni, April 19, 2024-a Mizoram Lok Sabha Inthlanpui neih tur atana Campaign theih hun chu Vawiin, April 17, 2024 tlai dar 4:00 hian a tawp dawn ta a, hemi hun atanga Vote thlak zawhfel hma chuan Television (TV) emaw, Electronic Media/Social Media hmanga inthlan kaihhnawih thil tarlan leh tihchhuahte khap tlat a ni.

Sawrkar kum kalta 2023-2024 chhung khan Mizoram Blood Bank hrang hranga thisen pek zinga za zela 91.22 chu mi tlawmngai ten damlo mamawh apiang ten an hman tura an pek niin Serchhip District Hospital Blood Bank-a thisen pek atanga za zela 95.43 chu a thlawna pek a ni bawk.

Tunkar Zirtawpni-a Mizoram Lok Sabha Inthlanpui neih tur atana Serchhip District-a Polling Official 3rd Randomization chu Vawiin hian neih a ni dawn.

Mizoram Lok Sabha Inthlanpui tun thla ni 19-ah neih a nih dawn tak avangin Serchhip District Magistrate David Lalthantluanga chuan Serchhip District chhungah inthlan boruak muanawm leh thianghlim tak a awm theih nan Section 126 (1) of The Representation of the People Act, 1951- in a tarlan ang leh CrPC 1973 Section 144 in thuneihna a pek hmangin Serchhip District chhungah Vawiin, April 17, 2024 tlai dar 5:00 atanga inthlan zawh hun thlengin mi panga (5) aia tam punkhawm khap a nih thu thuchhuah siamin a tarlang a. He thupek zawm lo te chu IPC Section 188-na hmanga hrem theih an ni ang. He thupek hian chhiatni leh thatni bakah Kohhran inkhawmte, Vote thlak tura kalkhawmte a huam dawn lo thung a ni.

Niminpiah tlai dar 5:30 vel khan Kolasib District chhung Meidum khua-a chenna In 7 te chu thli tleh in a tichhia a, heng zinga pahnih te chu luah zui tlak lohin a chhia a ni. Heng In chhia te seng-hawi leh siamthat hna hi nimin khan hnatlang a thawh niin Kolasib DC hnenah he thil thleng hi hriattir a ni a, Silpoulin 8 pek an nih bakah sawrkar atanga chhawmdawlna awm thei ang ang ngaih-tuah sak an ni bawk ang.

Kolasib District Four Lane Land Owner Association chu sawrkar laka an thilphut leh hemi tih hlawhtlin a nih loh chuan Lok Sabha Inthlan boycott an tum chungchang ah nimin khan thukhawmin Principal Chief Conservator of Forest (PCCF) ten Ministry of Road Transport and Highway-ah April 17, 2024-ah clearance an process ngei dawn tih thu an dawn avangin inthlan boycott an tum chu thulh nise an ti.

Nizan hmasa a Tlawng lui-a Chengkawl khawrh tura kal Lalthawmmawia (42), Tanhril tui-ah tlahlumin nimin khan vuiliam a ni. Thudawn danin Lalthawmmawia hi a nau te nen Chengkawl khawrh tur hian kalin zan dar 9:00 vela an haw dawnin a kim ve ta lo a, Nghaper lipui thlang deuh ah a Torch light eng hmuin Nghalchawm khaw mi te an pun hnuah a ruang hi an lachhuak thei a ni.

Lok Sabha inthlanpui lo awm tur atana Candidate te sum hman dan enfiah tum thumna, 3rd Inspection of Registers chu nimin khan Aizawl DC Conference Hall-ah  Expenditure Observer Arvind Sharma leh Anita Rinesh-i hovin neih a ni a, he hunah hian  Expenditure Agent te chu sum hmanna Register hrang hrang - Day to Day te, Accounts, Cash Register, Bank Register leh Bank Statement leh Voucher zawng zawng te chu Assistant Expenditure Observer leh Accounting Team ten an lo enfiahna atana Candidate te sum sen an lo chhinchhiahna, Shadow Observation Registers leh Folder of Evidence te nen en mil a ni a, Expenditure Agent te, Assistant Expenditure Observer leh Accounting Team te bakah Expenditure Monitoring Nodal Officer leh Assistant Nodal te an tel bawk a ni.

Mizoram Lok Sabha Inthlanpui neih tur atan Vawiin hian hmun hla zuala Duty tur Polling Party te chu an chhuak tan dawn ta a, Polling Party tam ber te chuan naktuk-ah an Duty-na tur hmun an pan dawn a ni. Lawngtlai District chhunga Polling Station 181 zinga Lawngtlai atanga hla zual Polling Station 116-a duty tur Polling Party-te chuan tukin hian an Duty-na tur hmun an pan dawn a, Lunglei District chhunga Polling Station hla zual 13-a Duty tur Polling Party te pawhin tukin hian Lunglei chhuahsanin Mamit District chhunga hmun hla zuala Duty tur Polling party te pawhin Vawiin hian Mamit an chhuahsan dawn bawk a ni.

ZPM Party chuan Zoram mipuite chu uar taka Vote thlak tur leh ZPM Candidate lo Vote turin an sawm.

All Mizoram Car Rental Association (AMCRA) chuan an thil nawr chungchangah thil hriatsual a awm tih sawiin, Adviser to Chief Minister TBC. Lalvenchhunga leh SCERT Deputy Director Florence Lalrinpuii bakah ZPM lakah ngaihdam an dil.

MNF Party chuan nimin khan thuchhuah siamin hun hmasa lamah khan Kuhva tawlh chungchangah ZPM chuan sawrkar hmasa kha nasa takin an dem thin tih tarlangin, mipuiin an kuta thuneihna an pek tak hnu hian Kuhva tawlh hian rem lam aiin pun lam a pan zawk zel emaw ni tih turin man thawm hriat tur a tam em em tih an tarlang a. Sawrkar rawih Police mai nilo, Civil mi thahnem ngaite pawhin an man ta zel mai nia tarlangin, “Civil leh civil inkara hetiang thil a thleng chho ta zel hian sawrkar inthlahdah zia a lantir a. Man an tam rual hian man lohva mit siai khum hi engemawzat a awm tel reng ang tih hi thil rinhlelhawm em em a ni,” an ti bawk.

Mizoram sawrkar-a Excise & Narcotics Department chuan sawrkar kum kalta, April 1, 2023 atang March 31, 2024 inkar chhung khan Zu leh kaihhnawih thildang hrang hrang atangin Chhiah Rs. 2,55,55,304/- zet an hmu.

Mizo Zirlai Pawl (MZP) chuan Mizoram Public Service Commission (MPSC) Chairman ban phut nana niminpiah atanga MPSC-a thawktute Pisa kai tur an dan chu nimin tlai dar 2:00 khan an titawp ta a, MPSC hnuaia hna lak danah thil fello nia sawi chungchang hi chhui turin sawrkar chuan M. Lalmanzuaia (IAS Retd) chu a ruat bawk a ni.

Aizawl SP Rahoo Alwal chuan tunhnaia Aizawl hmun thenkhata mi thil ruk ching mi pahnih an man thu a sawi.

Central YLA Kumpuan Committee chuan Myanmar a Oil leh bungrua thawnlut thinte chu tawpsan turin an ngen.

 

Excise and Narcotics Department hmalakna in nimin khan Serchhip-ah Ruihhlo dona kawnga nasa zawka hmalak dan tur leh kawng tha zawk a awm theihna tura hmalak dan tur sawihona chu Kohhran hrang hranga thalai pawl te tan buatsaih a ni.

Lok Sabha Inthlanpui neih tura 1-Mizoram (ST) Parliamentary Constituency viltu Police Observer K. Satyanarayana IPS chuan nimin khan Serchhip rawn tlawhin Inthlanpui neih tur atana mawhphurhna hrang hrang chelhtute a kawm.

Serchhip District chhunga kum upa leh Vohbik te tana mahni In lama Vote thlak chu zawhfel niin Vote thlak thei 184 zingah mi 177 ten Vote an thlak a ni.