Mizo Hnam chanchin zir rel
MZP rorelna sang ber dawttu Federal Council vawi 61-na chu nimin khan Aizawl-a MZP Conference Hall-ah neih niin MZP Vice President Sanghmingthanga chu Chairman niin MZP President Dr. C. Lalremruata chu House Leader a ni a, MZP President chuan House Address neiin, Election Commission of India (ECI)-in Special Intensive Revision (SIR) a kalpui mek chungchangah MZP chuan SIR 2005 leh 2026 Electoral Roll inkara Chakma punna chu zirchiangin ECI-in Final Roll a tihchhuah thlengin a enzui zel dawn tih a sawi a, Mizoram-a Central Institution hrang hrangah fello taka hnathawk tur lak tumna a awm thin chu MZP chuan a dem takzet tih pawh sawiin, hetiang thil hi Mizoram-ah a thlen an phal ngai dawn loh thu leh an do zel dawn thu a sawi a. Tunhnaia NIT Mizoram Registrar lak tur Advertisement kal mekah fello taka hnalak a awm loh nan MZP chuan ngun takin a enzui dawn tih a sawi bawk.
MZP Federal Council hian tun thla ni 23 atanga 25 chhunga MZP Assembly neih tura ngaihtuah turin Agenda 11 an pawm a, heng zingah hian Mizoram sawrkar enkawl College hrang hrang ten a an mamawh Bus an neih theih nan sawrkar a thlen te; Zofate kan inpumkhat lehzual theih nan School zirlaibu-ah Mizo hnam hrang hrangte chanchin telh a nih theih nana hmalak te; Zirlaibu-ah Mizo tawng dik tak hman anih theih nana hmalak te; Mizoram ramri dik tak humhalh a nih theih nana hma la tura sawrkara thlen te; ‘The Mizo Marriage and Inheritance of Property“(Amendment) Act, 2026’ khauh taka kenkawh a,hnamdang thlah ten Scheduled Tribe (ST) chanvo an chuh ve loh nana hmalak leh Mizo hming hawha hnamdang sumdawn tirte hremna Dan siam te a tel a ni.