Covid kai mi 7 enkawl mek

Health Department hnuaia Integrated Disease Surveillance Programme (IDSP) ten an chhinchhiah danin Mizoram-ah COVID-19 hri kai enkawllai mi 7 an awm leh mek a, kar kalta tir lamah hri kai mi pakhat chauh enkawl an awm laiin Nilaini khan hri kai mi 3 hmuin Zirtawpni leh Inrinni khan mi pahnih ve ve hmuh leh an ni. Heti hian kumin chhungin Sample 875 endik atangin COVID-19 hri kai mi 134 hmuh an ni tawh a, kum 2020 March thlaa hri kai hmuh a nih atangin mi 19,99,053 te enfiah tawh atangin hri kai mi 2,39,801 hmuh an ni tawh a, mi 734 ten an thihpui tawh a ni. Kumin hian May thla leh August thla ah COVID hri kai hi an pung tih IDSP chhinchhiahna atang hian a lang a ni.