Online hmanga dilna siam theih turin hma la mek
India khua leh tui, nau piang leh mitthi te chhin-chhiah dan ‘Civil Registration System’ chungchang ah Zirtawpni khan Serchhip DC Meeting Hall-ah thutkhawm neih niin Serchhip-a District Research Officer (DRO) Office atangin District Research Officer, L. Thangmawia leh thawktu dangte an tel a. He hunah hian DRO Office atangin K. Zodinpuia chuan Serchhip District-a an hmalakna tarlangin, kum 1985 atang khan piang leh thite hming hi record vek thin a ni a, tun dinhmunah Serchhip District-ah Death & Birth registration tih theihna Private Hospital tiamin Registration Unit 53 a awm mek a, kumin chhungin naupiang 240 leh mitthi 172 chhinchhiah an ni tawh a, Birth Certificate pek thar leh re-issue 1276 awmin Death Certificate 30 re-issue a ni bawk.
Nau piangte hi an pian atanga ni 21 chhungin a thlawnin register theih an ni a, ni 21 hnulamah chuan pawisa chawi a ngai tawh a, kum khat a vei hnuah chuan in register tur tan District Magistrate hriatpuina a ngai tawh a ni. Kum 2025 February thla atangin Digital Birth Certificate pekchhuah tan a ni a, Digital Certificate hi mahni pianna District Research Office-ah kala buaipui a ngai thin a; sawrkar chuan mipuite tan a awlsam zawk theih nan Online-a Digital Certificate dil theihna turin hma a la mek a ni.
He thutkhawm ah hian Directorate of Economics & Statistics-a Deputy Director (CRS) B. Vanrengi chuan Serchhip District chu hna an thawh that thu sawiin, District hrang hrang zingah report thehlut tha berte zinga mi an nih thu a sawi a. He hunah hian mumal lehzuala Registration tih theih dan tur te, mipuite tana Office dawr awlsam zawk theih dan turte, Department dangte nena thawhhona tha zawk leh chakzawka hmalak a nih theih dan turte sawiho a ni.