Falkawn-ah Edible Oil Processing Plant hawngin khawl hnathawh dan hlawhtling taka enchhin a ni
Rashtriya Krishi Vikas Yojana - Detailed Project Report (RKVY-DPR) 2023-24 hnuaia sak ‘Edible Oil Processing Plant’ hawnna ah hian Agriculture Minister PC. Vanlalruata chuan Mizoram chhungah ngei Oilseed herna tha tak neih a ni ta chu lawmawm a tih thu sawiin, changtlung taka a thanlen zel theihna turin duhsakna a hlan a. Sawrkar chuan farmer-te a ngaipawimawh a; Sawhthing, Nihawichi, Behliang, Antam leh Chhawhchhi chinna lamah hma a la chho zel a, a hralhna tur Market pawh sawrkarin a ngaihtuahpui zel tih sawiin, Farmer-te tan kawl a en zel thu a sawi a, heng processing (sawngbawlna) Industry hrang hrang rawn ding chho zel hian ram hmasawnna a la thlen zel tur thu sawiin, farmer-te tana innghahna tling eizawnna thlentu a nih ngei a beisei thu a sawi bawk. Agriculture Minister chuan farmer-ten hma an sawn zel theihna turin RKVY scheme ah kawng zawnpui zel an tum thu sawiin, Sawhthing buaipui mekah processing (sawngbawlna) lamah tan lak zel an tum thu sawiin, sawrkar chu farmer-te tan a inhawng reng a, anmahni chhawmdawla, an mamawhte phuhruksak zel chu sawrkar anga an tihtur a nih thu a sawi bawk.
He Processing Plant bunna building hi RKVY-DPR Scheme hnuaia FY 2021-22 sum hmanga sak a ni a, fencing hi FY 2022-23 sum hmanga sak leh niin a Tel (edible oil) herna khawl hi FY 2023-24 sum hmanga lei a ni bawk a. He Tel herna hmun (edible oil processing plant) ah hian thlai hriak nei chi reng reng chu her theih vek a ni.
He Khawl hi Agriculture & Farmers’ Welfare Department chuan Tender chhangtu Aizawl City Oilseed Growers and Processing Cooperative Society Ltd. chu enkawl tura thlangin kum 5 chhung daih turin nimin khan Mizoram sawrkar aiawhin A&FW Director Vanramthangi leh Aizawl City Oilseeds Growers and Processing Cooperative Society Ltd. aiawhin an Chairman Lallawmkima ten MoU an ziak nghal a ni.