Gauhati High Court Judge in Serchhip a rawn tlawh mek
Serchhip tlawhtu Justice Nelson Sailo hian nimin khan Serchhip rawn thlengin Chhiahtlang-a Serchhip District Jail a tlawh nghal a, District Jail building leh hmunhmate a enfiah bakah Jail-a tang mekte dinhmun enfiahin, an harsatnate a ngaithlak sak a, tangte mamawh tur thilpekte a hlan nghal bawk a. District Jail a tlawhnaah hian Justice Nelson Sailo chuan mipuite’n dan leh hrai leh mahni dikna chanvo te an hriat a pawimawh thu sawiin, harsatna tawkte tan anmahni tanpui tura Legal Services Authority te an awm reng thu a sawi a, Dan lam hriatna kawnga harsatna neite chuan an buaina te chu Legal Services Authority te hnena thlen nachang hre thin turin a chah bawk.
Justice Nelson Sailo hian nimin vek khan Serchhip-a Circuit Court leh Judicial Quarters-te a tlawh nghal bawk a, heng hmunhma te hi a enfiah bakah thawktute pawh a kawm nghal bawk a. Mizoram State Legal Services Authority-a Member Secretary Vincent Lalrokima leh Joint Secretary Thomas Lalrammawia te bakah Serchhip District Offcials - SP, CJM, DLSA Secretay, SDO (Sadar) leh DIPRO ten an tawiawm a ni.
Tun dinhmunah Serchhip District Jail-ah hian tang mipa 83 leh hmeichhia 10, an vaiin 93 an awm a. ND&PS Act vanga tang mipa 16 leh hmeichhia 5, Theft-ah mipa 36 leh hmeichhia 1, MLP Act-ah mipa 14 leh hmeichhia 4, POCSO Act-ah mi 8, Attempt to Murder-ah pakhat leh chhan dang avanga tang 8 an ni.
Ruahman dan chuan Justice Nelson Sailo hian Vawiin-ah Thenzawl Bazar Veng-a Legal Aid Clinic a tlawh leh dawn a, Legal Aid Clinic hi mipui ten dan leh hrai kaihhnawha thurawn an lak theihna hmun tur leh harsatna leh mamawhna an neih apianga an pan theih tur a ni.