Sports Minister in Nazareth Lalthazuala a lawmpui

Sports Minister Lalnghinglova Hmar chuan nimin khan a Pisa-ah Nazareth Lalthazuala chu lawmpuina a hlan.

June 5, 2026-a Bangkok-a ‘One Championship Friday Night Fight’ neih ah Phuaibuang khaw mi Lalthazuala hian hnehna changin niminpiah khan a rawn haw a, Sports Minister hian nimin khan a Pisa-ah lawmpuina hun hmangin, “Nazareth Lalthazuala hi December ni 5 khan One Championship-ah hnehna a chan avangin lawmpuina hun ka Pisa-ah kan lo nei tawh a, tunah hian a aia thleng sang zawkin lawmpuina hun kan hmang leh thei hi a lawmawm tak zet a ni,” a ti a. Niminpiah khan MuayThai leh Arm Wrestling lama Medal la te lawmpuina hun an hman thu sawiin, “Amah Nazareth-a leh Mizoram State Mixed Martial Art Association te nen kan inbepawp reng a, Vawiin-a lawmpuina hun pawh hi anni ho nena kan ruahman a ni,” a ti. Mizoram State Sport Council-ah MISMA chu Affiliated an la ni lo tih Sports Minister Lalnghinglova Hmar chuan sawiin, “Tehna hrang hrang a awm a, anni ho Affilliate theih lohna chhan leh a remchan lohna hi a remchanna lam zawk kha kan thlir tur a ni,” a ti bawk.

Sports Minister chuan India ramin 2036-ah Olympic thlen tumin hma a lak mek thu sawiin, “Zofate pawh Olympic-ah kan tel ngei theihna turin nasa takin hma kan la mek a, Mizoram atangin mi 2 chiah Olympic-ah kan la tel thei a ni. Mizote theihna lam hawi Combat Sport lam kan thlurbing deuh bik a, chumi atan chuan NESIDS (ORTRI) atangin cheng vbc. 38.4 kan hmu tawh a, Sport discipline pakhat hmingin a kal a ngai si a, Boxing Center of Excellent Aizawl-ah kan din dawn a ni,” tiin Boxing chauh ni lovin Combat Sport huang chhunga mi te a leng deuh vek turah an ngaih thu a sawi bawk.