Serchhip District-a Bank te hmalakna thlirin CD Ratio 70.43 a nih thu tarlan a ni
Serchhip DC Meeting Hall-a thutkhawm ah hian kum 2025 December leh kum 2026 March thla Quarter tawp a Bank te dinhmun leh an hmalakna hrang hrangte thlirho a ni a, he huna tarlan a nih danin Serchhip District-ah hian tun dinhmun ah Bank hrang hrang 6 awmin Bank Branch 20 a awm a. Mizoram Rural Bank (MRB) chuan Branch ngah berin Branch 10 an nei mek a, State Bank of India (SBI) chuan Branch pali neiin Mizoram Cooperative Apex Bank Ltd. (MCAB) in Branch pathum leh PNB, HDFC leh SLICE in Branch pakhat theuh an nei a ni.
Heng Bank Branch hrang hrangte hian March 2026 Quarter tawp, March ni 31, 2026 thlenga pawisa dahluh an dawn tlingkhawm chu cheng nuai 63250.18 niin Bank-in loan a pekchhuah tawh chu cheng nuai 44544.22 a ni a, Bank-in mipui pawisa a dawn atanga loan a pekchhuah zat tehna, Credit Deposit Ratio (CD Ratio) chu 70.43% a ni a, hei hian District chhungah sum che vel a tha tih entir a ni.
Pradhan Mantri MUDRA Yojana (PMMY) hnuaiah March 2026 Quarter tawp thlengin mi 326 hnenah cheng nuai 1163.41 semchhuah a ni, National Rural Livelihood Mission (NRLM) hnuaiah Self Help Group (SHG) 128 te hnenah cheng nuai 612.95 pek niin Pradhan Mantri Jan Dhan Yojana (PMJDY) hnuaiah Bank Account 22,813 hawn a ni tawh bawk a ni.
Govt. Sponsored Scheme hrang hrang NRLM, NULM, PMEGP, SUI, PMMY, KCC leh Social Welfare Scheme – PMJJBY, PMSBY leh APY etc. hnuaia hmalaknate leh Bank hrang hrangte thawh that dan (performance) report te he thutkhawm ah hian thlirho niin tan lak ngaihna laite sawiho a ni a. Govt. Schemes kalpui thin sawrkar Department hrang hrangte leh Bank te inkara thawhhona tha zawk a awm theih dan turte leh Financial Literacy Camp - sum leh pai enkawl dan leh Bank kaltlanga sum khawl leh peipun dan inzirtirna buatsaih chungchangte sawiho a ni bawk.
Hei bakah hian Bank Branch hrang hrangte him lehzualna atana Police ten an tlawh leh vil dan tur te, loan rulh that loh (NPA) awm thin tih tlem dan tur te, Community Based Recovery Mechanism (CBRM) mumal zawka kalpui dan tur te, Mobile/computer kaltlanga dan bawh-chhiatna (Cyber Crime/Fraud) awm thei laka inven dan leh thil tisualtute hrem dan tur chungchangte pawh he hunah hian sawiho a ni bawk.