Kumin chhungin Mizoram-ah In kang 26 awm tawhin ramkang tum 57 a awm tawh bawk
Fire & Emergency Services Department chhinchhiah danin, kumin (2026) chhung hian Mizoram-ah chenna In kang 26 awm tawhin ramkang (forest fire) 57 a awm tawh bawk a, kumin chhunga In kang ah hian bungrua Rs. 4,37,02,000 hu zet a kangchhia nia chhut a ni a, kumin chhunga kangmei chhuah nasat ber thla chu March thla kha niin, hemi thla ah hian In kang 10 awmin ramkang 28 a awm bawk a, bungraw kang chhia hlut zawng chu Rs. 1,69,94,500 hu a tling ni chhut a ni bawk.
Nikum 2025 chhung khan Mizoram-ah chenna In kang 31 awmin, ramkang 164 a awm a, kangmei vanga thi pakhat a awm laiin hliam tuar pakhat a awm bawk a, nikum chhung khan In kang ah bungrua Rs. 4,68,84,530 hu a kangchhia nia chhut a ni bawk a. Nikum chhunga kangmei chhuah nasat ber thla, March-ah chenna In kang paruk awmin, ram kang 92 a awm a. Hemi thlaa bungraw kang chhia hlut zawng chu Rs. 3,00,62,330 a tling a. Kum hmasa, kum 2024 chhung khan Mizoram-ah kangmei chhuak vanga bungraw chhia Rs. 8,84,57,960 hu a awm a, kangmei vanga thi pali an awm bawk a ni. Chhinchhiahna atanga a lan danin kum 2012 atanga kumin 2026, kum 15 chhungin Mizoram-ah kangmei vanga thi mi 51 an awm tawh a, kangmei vanga thi awm tam ber kum chu kum 2022 kha niin mi 15 lai an thi a ni.
Fire & Emergency Services hotute chuan kangmei chhuak thei pum pelh nan Electric Wiring uluk taka siam a, MCB hmang theuh turin chhungkaw tin te an ngen a, Gas hmanga eirawngbawl leh thing tuah thuk hmangte pawhin thuk hman zawhah uluk taka timit thin turin an ngen bawk a. Ramkal ten ram kalnaa an meituah/chhem tha taka timit tur leh ar leh vawk vulhten an ranvulhna atanga kangmei tichhuak thei thuk leh Electric hrui zam uluk zawk thlithlai reng turin an ngen a, mi tupawhin zial zuk bung timit tha lova khawi hmunah mah paih loa kangmei tichhuak thei thil - Petrol/Diesel/Gas/Khawnvartui zuarten kangthelhna hmanrua (fire extinguisher/sand bucket) inchhawp ngei turin an ngen bawk a, heng bakah hian kangmei a chhuaha tanpuitu kan kohin chhiatna thlenna hmun chiang taka hrilh thin turin mitinte an ngen bawk a ni.