Tuivai HEP Project atan Tender tihchhuah theih tawh

Nimin khan Chief Minister Lalduhoma hovin a Pisa-ah kawlphetha MW 132 pechhuak thei tur Tuivai Hydroelectric Power Project chungchang chu P&E Minister F. Rodingliana leh P&E Department-a thawktu ten an sawiho.
Tuivai lui hi kum 1992-ah Central Water Commission chuan kawlphetha MW 210 pechhuak thei turin a lo survey tawh a. Nimahsela, Tui hian Manipur State chhung a chim tel dawn avangin Survey hi a thara kalpui leh a ni a. Megawatt 132 pechhuak thei tura duan that niin tunah hian Detailed Project Report (DPR) peihfel a ni tawh a. Tender tihchhuah theih niin PPP Mode-a kalpui tura tinzawn a ni a, DPR ang chuan he hna hi kum nga (5) chhunga thawh zawh tur leh cheng vbc. 2289.50 senna tura duan a ni a. Hna kalpui tura kumtin a sum leh pai sen ngai zat turte Finance Department nena enho tura tih a ni.

Tun dinhmuna Mizoram power mamawh hi a san lai berin MW 182 a ni a, 20th Electric Power Survey chhut danin kum 2030-ah khian Mizoram power mamawh zat tur hi a san lai berin MW 213 vel ni tura chhut a ni a. Tunah hian State sawrkar hian power siam theihna (installed capacity) hi MW 50.20 kan nei mek a, a tak taka an siamchhuah zat phei chu a tlem lehzual a. A mamawh zawng zawng zaa sawm (10%) vel chauh tharchhuak ang a ni a. Kum khata power lei nana Mizoram sum senral hi Transmission charge tel lovin cheng nuai 64,954.45 vel a ni a. Hei vang hian Mizoramin power siamchhuahna tam zawk a neih hi thil tul tak nia ngaih a ni.

Nimin-a he sawihona hunah hian Tuivai Project bakah Tuirini Project kalpui mek te leh RDSS hnuaia hnathawh mek te pawh an sawi a. Union Power Minister-in Mizoram a rawn tlawh huna Mizoram mamawh lo sawipui turte pawh an sawiho a ni bawk.