Gujarat, Maharashtra, Sikkim leh Goa State dincham lawm

Mizoram Larsap, General (Dr) Vijay Kumar Singh chuan nimin khan ‘Ek Bharat Shreshtha Bharat’ hmalakna hnuaiah Gujarat, Maharashtra, Sikkim leh Goa-te State puitlinga hlankaina ni 'Foundation Day' lawmna chu Lok Bhavan Durbar Hall-ah a buatsaih.

Nimin-a he hun hman ah hian Larsap General (Dr) Vijay Kumar Singh chuan Prime Minister Narendra Modi hmalakna hnuaia Hnam inpumkhatna programme, 'Ek Bharat Shreshtha Bharat' chu Lok Bhavan leh Lok Niwas hrang hrangah te hman thin a nih thu a sawi a. India rama chengte zingah hnam ziarang, nunphung, ei leh in, incheina leh a dangah te inanlohna nasa tak a awm thu leh State pakhat chhungah ngei pawh hmuh theiha a awm thu sawiin, “He kan inanlohna hi India danglam bikna, ropuina leh chakna a ni,” a ti a. State palite chanchin danglam bikte sawiin, “India ram State hrang hrangte hian mawina bik an nei theuh a ni,” a ti a. Programme hlawhtlin theih nana hnam lam leh zai entirtute fakawm a tih thu sawiin, he hun an hman chuan India ram hriat-chian lehzual kawngah kalkhawmte a puih ngei a beisei thu a sawi bawk.

Gujarat leh Maharashtra-te hi May ni 1, 1960 khan State-ah hlankai an ni a. Sikkim hi May ni 16, 1975 khan State puitlinga hlankai niin, Goa hi May ni 30, 1987 khan State puitlinga hlankai a ni bawk a. Nimin-a heng State te dinchampha lawmna buatsaih ah hian Gujarat Larsap Acharya Devvrat, Maharastra Larsap Jishnu Dev Varma, Sikkim Larsap Om Prakash Mathur leh Goa Larsap Pusapati Ashok Gajapathi Raju te thuchah bakah State hrang hrangte chanchin tarlanna video tawi thlirho a ni a. College of Veterinary Sciences & Animal Husbandry leh Govt. Mizo Higher Secondary School zirlaite'n hnam lam leh zai mawi tak tak an entir a. Hemi hnu hian Larsap chuan hemi puala kalkhawmte hi Lok Bhavan Upper Lawn-ah kawmin hun hlimawm tak an hmang ho nghal a ni.