ASF inzirtirna kalpui zel

African Swine Fever (ASF) hri leng thar mek chu Serchhip District-ah hmuh la ni lo mah se he hri leng chungchang inzirtirna chu khaw hrang hrang ah neih mek a ni.
AH&Vety Department hotute hnen atanga thudawn danin kumin a ASF hri leng thar leh mek hi District thenkhat ah hmuh ni tawh mah se Serchhip District-ah chuan hri kai rinhlelh a awm hriat a la ni lo a, hetihlai hian he hri avanga mipui ten harsatna an tawh lohna turin khaw hrang hrangah he hri leng chungchang inzirtirna hi kalpui mek a ni a, Mipuite chu sawrkar in Vawk leh a sa lakluh chungchanga khuahkhirhna a siam te zawm vek turin an chah bawk a ni.

AH&Vety Department chhinchhiahna atanga a lan danin nimin thleng khan Mizoram-a ASF avanga Vawk thi chu 1524 a tling tawh a, Vawk 479 suat ni leh tawh bawkin District hrang hrangah Vawk lakluh khapna thupek te tihchhuah a ni leh tawh bawk a ni.