CM in YMA Day a hmanpui

Chief Minister Lalduhoma chuan Biate Branch YMA in YMA Day vawi 89-na lawmna Zialung Community Hall-a an hman chu Inrinni khan a hmanpui a, Pastor 41 zet lo chherchhuak tawh, MLA 7 leh MP 1 lo hring tawh, Mizo pa lar L. Malsawma Colney khua, Mizoram-a khaw fai ber lawmman vawi 6 la thei Biate Branch YMA in YMA Day hmang tura an sawm chu a lawm thu sawiin, “Tui leh leilung kan enkawl danah insiam-that kan ngai a, nun thlahdah vanga kum naupang taka thihna te, nupa inthenna te, HIV/AIDS te, Cancer te a tam hle a. Rukruk a hluarin, thalai vakrawlai kan tam tual tual. Pi leh pute atanga kan neih zonun ze mawi te a boral nasa ta. Hawh u, i din thar leh ang u, mitinin mahni zawnah mawh-phurhna ka nei vek a ni,” tiin YMA member te a sawm a ni. Chief Minister hian Biate Branch YMA ten mi harsa, In luah tur hmu mai lo te tlanluh lai-lawkna tur an sak mek puih nan cheng nuai thum  a hlan bawk.