Oil Depot siam turin thla 3-ah hna tan theih beisei

Mizoram-a Oil Depot siam turin tun atanga thla thum (3)-ah hna tan theih an beisei tih Supply Minister K. Lalrinliana chuan a sawi.

Nimin a MNF party in Aizawl-a Mizo Hnam Run-a Chhung Inkhawm an neih ah MNF Adviser leh Minister ni bawk K. Lalrinliana chuan nitin mamawh lama intodelh a tul thu sawiin, harsatna lian tak hmachhawn tul palh ta se Mizoram-ah chuan Oil dahkhawmna kan neih chhun chu Petrol Pump a nih mai thu leh India rama Oil Depot neilo awm-chhun kan ni tih a sawi a, “Oil dahkhawlna tikhat vek pawh ni ila ni 5 bak a daih lo,” a ti a. “Kan sawrkar tirh khan Oil dahkhawlna neih tumin hma kan la a, Central kan dawr tawh a. A hmun tur kan inbiak fel hnuah Company lamin duh dan dang an rawn nei leh a. Tun atanga thla thumah hna tan theih kan beisei,” a ti a. “Gas pawh kan sawrkar hma khan ni tin trip 15 min pe thin. Kan sawrkar tirh khan Central-ah ni tin trip 20 tal tiin kan dil belh a. ‘Minister ber lokal ta chu,’ tiin ni tin trip 23 min pe ta a. Tunah hian thla thum daih dahkhawlna neih kan tum mek bawk a ni,” a ti.