Rod zuartute pawisa chawitir

Serchhip-a Iron Rod zuar te enfiah tuma a nih tur ang tling phaklo Iron Rod zuar man te chu pawisafai chawitira hrem an ni.

Tarlan tawh angin Feb. 16, 2022 khan Serchhip District Bawrhsap hmalakna in Serchhip khawpui chhunga Iron Rod zawrhna dawr te chu enfiah niin hetah hian BIS in Iron Rod nih tur ang a tih (Standard Size) phaklo te chu man an ni a, heng te hi dawr 5 atanga man niin heng te hi an chungchang ngaihtuah a nih hnuah pawisafai chawitir an ni a, tun thla chhunga an Iron Rod zawrh te hi hralh zo vek tura tih an ni bawk.

Serchhip-a Legal Metrology Inspector Johny Zonunmawia chuan heng dawr te hi an Iron Rod zawrh te a buk ngeia hralh tawh tura tih an nih thu pawh sawiin, Iron Rod lo thleng te pawh a buk dik in a lo thleng em tih lo enfiah thin tur leh harsatna an nei a nih chuan Legal Metrology lama thawktute hnenah hriattir thin tura an hrilh thu a sawi a, Iron Rod nihphung tur teh dan te pawh an inhrilhfiah thu a sawi bawk.